Kompania ka tërhequr vaksinën e saj kundër Covid, globalisht. Produkti nuk ka kërkesa të mëdha dhe nuk është më i përditësuar në lidhje me variantet. Nuk ka lidhje as me efektet anësore të njohura tashmë
Më 7 maj, komiteti i sigurisë AMA (Agjencia Evropiane e Barnave) lëshoi një paralajmërim kundër përdorimit të vaksinës AstraZeneca Vaxzevria, duke përmendur një disponueshmëri të gjerë të vaksinave më të fundit të përshtatura me variantet e virusit. Shumë e lidhin lajmin e tërheqjes me procedimin penal që u zhvillua në Londër, në të cilin kompania anglo-suedeze pranoi se vaksina e saj mund të shkaktojë trombozë si një efekt anësor i rrallë, por është një lidhje e pabazë – shpjegon Matteo Bassetti për Tgcom24, drejtor i klinikës së sëmundjeve infektive të spitalit San Martino në Xhenova.
“Fenomeni i trombozës është i njohur prej disa kohësh, aq sa është përfshirë në fletëpalosjen informative ndër efektet anësore të mundshme e të rralla; në fakt në vendin tonë vaksina AstraZeneca nuk përdoret më që nga viti 2021. Produkti u tërhoq thjesht sepse është një vaksinë e vjetër dhe jo më adekuate në krahasim me variantet. Dhe kjo është arsyeja pse BE-ja ka vendosur të fokusohet në ato vaksina mRNA që përshtaten më shpejt me variantet e reja”.
Çfarë karakteristikash ka vaksina Vaxzevria? Është një vaksinë vektoriale virale e bazuar në adenovirusin ChAdOx1, e zhvilluar në Institutin Jenner të Universitetit të Oksfordit në bashkëpunim me AstraZeneca dhe Parkun Shkencor Italian IRBM. U miratua në MB më 30 dhjetor 2020.
Në fund të janarit 2021, EMA (Agjencia Evropiane e Barnave) dhe më pas Aifa (Agjencia Italiane e Barnave) kishin dhënë dritën jeshile për administrimin e subjekteve 18 vjeç e lart. ChAdOx1 është një adenovirus i shimpanzeve (Chimpanzee Adenovirus Oxford 1), përgjegjës për ftohjen e zakonshme. Për prodhimin e vaksinës, është përdorur një version i dobësuar, pra i paaftë për t'u riprodhuar dhe i padëmshëm për organizmin e njeriut, në të cilin është futur materiali gjenetik i proteinës Sars-CoV-2 Spike.
Pasi vaksina të administrohet, adenovirusi hyn në bërthamën e qelizës ku siguron kodin gjenetik për të prodhuar proteinën Spike. Në këtë mënyrë, qelizat T aktivizojnë përgjigjen imune dhe prodhimin e antitrupave specifikë kundër virusit.
Për cilat kategori është përdorur vaksina? Në fund të janarit 2021, EMA kishte autorizuar Vaxzevria vetëm për personat nën moshën 60 vjeç, sepse nuk kishte të dhëna të mjaftueshme për efikasitetin dhe sigurinë tek të moshuarit. Menjëherë pas kësaj, në shkurt, drita jeshile erdhi edhe për ata mbi 60 vjeç: në atë moment vaksina u miratua për të gjithë të rriturit, 18 vjeç e lart.
Më pas, në prill 2021, u raportuan rastet e para të rralla të trombocitopenisë trombotike. Në fillim të muajit maj, pas evidentimeve të para për rastet e trombozës, edhe nëse korrelacioni ende nuk ishte vërtetuar me siguri, Ministria e Shëndetësisë italiane kishte rekomanduar, si masë paraprake, rezervimin e vaksinës për personat e moshës 60 vjeç e lart. (Shqipëria ka ndjekur modelin italian të reagimit ndaj pandemisë)
“Vaksinat e bazuara në vektor adenoviral janë treguar të jenë më pak efektive se ato të mRNA që në fillim,” thotë Dr. Sergio Abrignani, profesor i imunologjisë dhe imunopatologjisë në Universitetin Shtetëror të Milanos dhe drejtor i Institutit Kombëtar Romeo të Gjenetikës Molekulare. – “Nëse ne do të kishim disponueshmëri të madhe të vaksinave mRna që nga fillimi, vaksinat e vektorit viral ndoshta nuk do të ishin përdorur. Që nga fillimi, vaksinat e vektorit viral kanë pasur edhe një kufizim imunologjik: ato nuk mund të përdoren si përforcues, sepse pas dozës së dytë shpesh zhvillohet një përgjigje imune ndaj komponentit adenoviral, i cili mund t'i bëjë dozat e mëvonshme joefektive”.
Covid, AstraZeneca tërheq vaksinën e saj në mbarë botën
Si u administrua vaksina AstraZeneca? Vaksina Vaxzevria u administrua në dy doza, në muskulin e krahut: e dyta duhet të administrohet gjatë javës së dymbëdhjetë dhe në çdo rast të paktën dhjetë javë larg nga e para.
A ka të bëjë vetëm me vaksinën AstraZeneca problemi i ngjarjeve të padëshiruara? Jo, ka të bëjë me të gjitha vaksinat e vektorit viral, pra edhe atë të prodhuar nga Johnson & Johnson/Janssen (Ad26.COV2.S). Pas dyshimit për një lidhje me rastet e trombocitopenisë trombotike, midis marsit dhe prillit 2021, përdorimi i vaksinës së prodhuar nga AstraZeneca u bllokua nga autoritetet shëndetësore të disa vendeve evropiane dhe përdorimi i saj u ri-miratua më pas nga EMA pas vlerësimit të raportit rrezik/përfitim. Vaksinat e mRNA nuk kanë asnjë lidhje me rrezikun e rrallë të trombocitopenisë trombotike.
AstraZeneca tërhiqet, qytetarët: “E kush do të na dëmshpërblejë nëse jemi të dëmtuar?”.
A rrezikon ndonjë gjë personi që e ka marrë? “Ne i sigurojmë përfundimisht të gjithë ata që janë vaksinuar me AstraZeneca – thotë Matteo Bassetti, drejtor i klinikës së sëmundjeve infektive në spitalin San Martino në Genova – të gjitha rastet e raportuara të trombozës së shkaktuar nga vaksina ndodhën brenda dy javësh nga administrimi i vaksinës, kështu që ata që kanë marrë vaksinën AstraZeneca për disa muaj apo edhe vite nuk janë në rrezik për ta zhvilluar atë."
Përgatiti: a.m /Liberale.al/
