Reperi i njohur 50 Cent ka reaguar menjëherë pas vendimit të gjykatës për rastin e Diddy-t, duke komentuar në mënyrën e tij të zakonshme ironike dhe thumbuese.

Pak më parë, Diddy (emri i vërtetë Sean Combs) u shpall fajtor për dy akuza për transportim personash për qëllime prostitucioni, çka mund t’i sjellë një dënim maksimal prej 20 vitesh burg. Megjithatë, ai u lirua nga disa prej akuzave më të rënda, përfshirë ato për organizatë kriminale, trafikim seksual dhe komplot për shantazh.

50 Cent nuk e humbi rastin për ta komentuar këtë vendim. Ai postoi në Instagram një foto ku buzëqesh dhe shkruan:

“Diddy i mundi federalët, ky djalë është i keq. Ai është gej John Gotti”, duke iu referuar mafiozit të njohur italo-amerikan.
Në sallën e gjyqit, sipas dëshmitarëve të pranishëm, Diddy shfaqi një qëndrim falënderues ndaj jurisë, duke formuar duart në formë lutjeje dhe duke pëshpëritur një "faleminderit", përpara se të shikonte lart dhe të lutej.

Mosmarrëveshjet dhe thumbimet mes 50 Cent dhe Diddy-t datojnë që nga fillimi i viteve 2000, por tensionet janë shtuar veçanërisht gjatë muajve të fundit, për shkak të hetimeve dhe problemeve ligjore që përfshinë Diddy-n.