Shkrimtari dhe studiuesi Ilir Ikonomi është shpallur fitues i Çmimin “At Zef Pllumi” 2025, me vëllimin e dytë për Fan Nolin, “Rebeli”.
Ikonomi është nderuar për kontributin e çmuar në fushën e publicistikës historike, për risitë që sjell në trajtimin e figurës komplekse të Theofan Stilian Nolit, për këndvështrimin origjinal dhe analizën e thelluar të etapave kyçe të jetës dhe veprimtarisë së tij shumëdimensionale.
Çmimi “At Zef Pllumi”, jepet çdo vit nga bashkia e Lezhës në fushën e publicistikës, memuaristikës, monografisë dhe dokumenteve, në kujtim të një prej figurave më të ndritura të kulturës dhe identitetit shqiptar.
Juria e këtij viti drejtohej nga studiuesi i letërsisë, Ermir Nika, me anëtarë: Alda Bardhyli, drejtuese e QKLL-së; Aleksandër Furxhi, gazetar; prof. dr. Arben Prendi, shef i Departamentit të Gjuhë-Letërsisë në U.SH. “Luigj Gurakuqi”; prof. Gjon Marku, studiues, shkrimtar.
I emocionuar nga ky vlerësim, Ikonomi tha gjatë marrjes së çmimit në ambientet e bibliotekës së Lezhës, se gjithmonë ka qenë i pasionuar pas veprave të At Zef Pllumit.
I vlerësuar si një studiues skrupuloz dhe një prej biografëve më të mirë që ka sot Shqipëria, Ilir Ikonomi ka sjellë me shtëpinë botuese UETPRESS jetëshkrimet e disa prej personaliteteve e figurave më me ndikim në historinë e Shqipërisë, si: Ismail Qemali, Esat Pashë Toptani, Ahmet Zogu, Faik Konica.
Dy vitet e fundit, puna e tij kërkimore është e fokusuar te jeta dhe veprimtaria e peshkopit, politikanit, përkthyesit e veprimtarit Fan Noli, duke e sjellë atë përmes disa vëllimeve. Vëllimi i parë “Apostulli”, i cili fitoi Çmimin” Lumo Skëndo”, pasqyron aktivitetin e Nolit si emigrant në Amerikë, shkollim, përpjekjen e tij për të çuar para lëvizjen shqiptare. Në vëllimin e dytë, të botuar në 2024-ën, nën titullin “Rebeli”, vijnë ngjarjet e pesë viteve 2020-2024, kur Noli kthehet në Shqipëri dhe nis një betejë politike, e cila rezultoi jetëshkurtër dhe e pasuksesshme.
Autori po punon për vëllimin tretë dhe të fundit, atë të kthimit të Nolit sërish në Amerikë për të vijuar punën intelektuale, të botimit dhe përkthimeve.
