Një djalë dhe një vajzë, të kapur për dore, në mes të një rruge. Ajo, pa mbulesë, i mban dorën. Është fotoja e puthjes së ‘ndaluar’ në natën e Shirazit, në një vend Iran, ku një gjest kaq i thjeshtë mund të kushtojë arrest, në mos më keq.
Fotoja që po bën xhiron e internetit prej disa orësh nuk është ajo e një momenti privat, është pjesë dhe simbol i demonstratave që po mbushin rrugët e vendit të Lindjes së Mesme dhe që shkaktuan të paktën 12 vdekje vetëm ditën e djeshme.
Për gati muaj, të rinjtë kanë dalë çdo ditë në rrugë kundër qeverisë së Teheranit për vdekjen e Mahsa Amini, 22-vjeçares me origjinë kurde që vdiq dy muaj më parë pasi u arrestua për mosmbajtjen e duhur të mbulesës.
Fotoja e puthjes u postua në profilin në Twitter të Siavash Ardalan, një gazetar i BBC-së. Do të ishte realizuar nga një përdorues anonim të martën mbrëma në Shiraz, përgjatë rrugës "Moali Abad", ku po zhvilloheshin demonstrata të reja për përvjetorin e Abanit të përgjakur, siç e quajnë iranianët, "Nëntorin e përgjakshëm" të 2019-ës, kur qindra njerëz u vranë gjatë një vale protestash për rritjen e çmimit të karburantit.
Një mënyrë për të "festuar jetën", përgjigjet një përdorues në Twitter. Ajo puthje “është kuptimi i revolucionit tonë”, shkruan një tjetër vajzë 22-vjeçare në rrjetet sociale.
Irani sapo ka hyrë në muajin e tretë të protestave që kanë përfshirë vendin. Demonstratat që nga shtatori kanë qenë më të ndjekurat, por edhe më të shtypurat ndër vite. Sipas OJQ-së disidente Iran Human Rights, u vranë 342 persona, 43 të mitur. Të paktën 14,000 njerëz u arrestuan sipas Kombeve të Bashkuara.
Me vdekje janë dënuar edhe disa persona të përfshirë në protestat, të cilat kanë nisur të intensifikohen sërish ditët e fundit./Liberale.al