Një ngjarje e rëndë ka tronditur opinionin publik në Gjermani. Një grua 35-vjeçare me prejardhje polake, që jetonte në qytetin Bad Hersfeld në landin Hesse, dyshohet se ka vrarë vajzën e saj të sapolindur dhe më pas ka fshehur trupin e saj në frigorifer.
Sipas raportimeve nga mediat gjermane, nëna dyshohet se e goditi foshnjën në kokë menjëherë pas lindjes, duke i shkaktuar lëndime të rënda në tru, fraktura të kockave dhe hemorragji cerebrale. Mjekët kanë konstatuar se foshnja kishte qenë e zhvilluar plotësisht dhe e shëndetshme në momentin e lindjes.
Për ta fshehur krimin, gruaja dyshohet se e mbështolli foshnjën me një batanije, e futi në një qese pazari dhe më pas e vendosi trupin në frigoriferin e shtëpisë së saj. Trupi i foshnjës u zbulua katër muaj më parë në shtëpinë që ndodhet në një zonë të qetë banimi.
Zyra e prokurorit të Fuldës ka ngritur tani akuza zyrtare ndaj nënës, ndërsa thuhet se krimi mund të ketë ndodhur në periudhën mes janarit 2022 dhe prillit 2024.
