Sipas raportimeve të Associated Press, SHBA ka nisur zhvendosjen e burimeve ushtarake në Lindjen e Mesme, përfshirë anije luftarake, në përgjigje të një kërcënimi të mundshëm nga Irani. Lëvizja vjen në një moment tensioni të shtuar në rajon, ku zyrtarët amerikanë nuk përjashtojnë një reagim të mundshëm nga Teherani.
Burime të larta nga administrata amerikane thanë për AP se shkatërruesi detar USS Thomas Hudner është urdhëruar të drejtohet drejt Mesdheut Lindor, ndërkohë që një tjetër anije luftarake amerikane është në lëvizje dhe në gjendje gatishmërie për çdo zhvillim të mëtejshëm.
Njëri nga zyrtarët konfirmoi gjithashtu se presidenti Donald Trump është duke u konsultuar me anëtarët kryesorë të Këshillit të Sigurisë Kombëtare, për të analizuar situatën dhe për të shqyrtuar hapat e mëtejshëm që mund të ndërmerren.
Zyrtarët që kanë folur për AP-në kanë kërkuar të mbeten anonimë, pasi informacionet nuk janë bërë ende publike. Megjithatë, prania e shtuar ushtarake amerikane në rajon sinjalizon përgatitjen për çdo skenar të mundshëm, në një kohë kur marrëdhëniet mes Uashingtonit dhe Teheranit mbeten të tensionuara.
