Viti i Ri 2025 ka trokitur në disa vende të Azisë me shfaqje fishekzjarres në Hong Kong, Singapor, Malajzi dhe Filipine, ndërsa miliona njerëz u mblodhën nga Pekini në Kuala Lumpur për të festuar fundin e 2024 dhe fillimin e 2025.
Përpara vitit të ri në Kinë, presidenti Xi Jinping i tha kombit se ekonomia është në një “trajektore rritëse” dhe lëshoi një paralajmërim për ato që Pekini i sheh si forcat pro-demokracisë në Tajvanin e vetëqeverisur pas vitesh tensionesh në rritje.
Zelanda e Re dhe Australia mirëpritën më herët 2025. Auckland ishte qyteti i parë që festoi ardhjen e Vitit të Ri me shfaqjen spektakolare të fishekzjarrëve nga Kulla ikonë Sky, një moment që mbledh mijëra qytetarë dhe vizitorë në zemër të qytetit.
Shfaqja e fishekzjarreve filloi me një numërim mbrapsht 10 sekondash të projektuar në bazën e Kullës Sky Tower 328 metra të gjatë të kryeqytetit Auckland, e ndjekur nga fishekzjarre që ndriçuan qiellin e natës dhe të shoqëruar nga një shfaqje me drita lazer.
Spektakli i fishekzjarreve zgjati pesë minuta, me më shumë se 500 kilogramë lëndë piroteknike të lëshuara nga vende të ndryshme të qitjes me urën e portit të Auckland gjithashtu të ndriçuar.
Pas ishullit Kiribati dhe Zelandës së re, ishte Australia që priti vitin e ri 2025. Në shfaqjen e zakonshme në Sidnei u bë spektakli i fishekzjarreve, për të cilin u përdorën 9 ton lënë piroteknike. Ato u lëshuan nga Shtëpia e Operas dhe Ura e Portit të famshëm ku çdo vit zhvillohet ceremonia ikonë e natës së ndërrimit të viteve teksa Sidnei cilësohet edhe si kryeqyteti botëror i ndërrimit të viteve.
