Presidenti i Hungarisë ka nënshkruar një ligj të propozuar nga partia qeverisëse Fidesz e Viktor Orban që ndalon paradën vjetore të Krenarisë, duke sfiduar kritikat nga grupet e të drejtave të njeriut që thonë se ligji kufizon lirinë e tubimit.

Pasditen e djeshme, protestuesit bllokuan një urë në qendër të Budapestit pasi ligji u miratua nga parlamenti.

Opozita reagoi gjatë votimit duke hedhur bomba tymuese në parlament, ndërsa luhej himni kombëtar rus. Madje, ata hodhën edhe fotot e montuara që shfaqnin kryeministrin Viktor Orban dhe presidentin rus Vladimir Putin duke u puthur.

Projektligji i dorëzuar të hënën u miratua me procedurë të jashtëzakonshme me shumicë të madhe nga koalicioni qeverisës i mbështetur nga deputetët e ekstremit të djathtë (136 vota pro, 27 kundër).

Presidenti Tamás Soulik, një ish-kryetar i Gjykatës Kushtetuese, i cili u zgjodh në detyrë një vit më parë nga shumica parlamentare Fidesz, nënshkroi ligjin. 

Ky ligj e ndalon Paradën e Krenarisë me arsyetimin se mund të jetë e dëmshme për fëmijët. Ai gjithashtu parashikon që policia do të jetë në gjendje të përdorë kamera identifikimi për të identifikuar personat që marrin pjesë në paradë dhe për të vendosur gjoba për pjesëmarrësit.

Orbán, i cili po menaxhon një ekonomi të lëkundur dhe një sfidë të paprecedentë nga një parti opozitare e sapoformuar përpara zgjedhjeve në 2026, ka qenë gjithmonë kritik ndaj komunitetit LGBTQ+./ Përktheu  Liberale.al