Të paktën 7 persona kanë humbur jetën dhe disa të tjerë janë plagosur si pasojë e sulmeve ajrore ruse në disa zona të Ukrainës më 31 maj. Mes viktimave është edhe një vajzë 9-vjeçare, ndërsa një djalë 16-vjeçar ka mbetur i plagosur.

Raketat ruse goditën një lagje banimi në rajonin e Zaporizhjës, duke shkatërruar shtëpi dhe dëmtuar ndërtesa të tjera. Tre persona të tjerë u vranë në zonën e Pokrovsk në Donjeck, ku prej muajsh ka luftime të ashpra. Dy persona humbën jetën edhe në një fshat aty pranë.

Në rajonin e Hersonit, një burrë 60-vjeç është vrarë nga granatimet. Edhe pse Hersoni është çliruar nga ukrainasit që në vitin 2022, qyteti vazhdon të sulmohet nga forcat ruse përtej lumit Dnjepër.

Ndërkohë në veri, në rajonin e Sumit, autoritetet kanë urdhëruar evakuimin e disa fshatrave për shkak të avancimeve ruse pranë kufirit. Rusia pretendon se ka marrë nën kontroll disa fshatra në këtë zonë, ndërsa Ukraina nuk e ka konfirmuar këtë informacion.

Nga ana tjetër, Rusia ka ftuar Ukrainën për një raund të ri bisedimesh për paqen që mund të zhvillohet më 2 qershor në Stamboll. Raundi i parë ndodhi më 16 maj dhe përfundoi vetëm me marrëveshje për shkëmbim të të burgosurve. Ukraina ka shprehur gatishmërinë për të marrë pjesë në takim, por kërkon të dijë më parë kushtet që Rusia do të vendosë për paqen.