Edhe pse kolegë, kandidatët për deputetë në listën e hapur, janë në “luftë” të paprecedentë me njërin-tjetrin, pasi një votë më shumë se “rivali” të çon në Parlament.
E ndërsa lufta në terren për të kapur çdo votë nominale ka filluar të bëhet e ashpër, duke ngjallur pakënaqësi dhe duke ndikuar edhe strukturat e partisë, ka bërë që kryeministri, njëkohësisht kryetarin e PS Edi Rama, të ndajë vijat kuqe për kandidatët e tij.
Rama u ka dërguar porosi socialistëve që asnjë kandidat, qoftë edhe deputet aktual, nuk duhet të përdorë strukturat e PS të një zonë tjetër për të mbledhur vota personale.
“Asnjë deputet s’duhet të hapë zyra te veta jashtë zonës së caktuar nga drejtuesi politik. Deputeti është i lirë të bëjë takime ku të dojë, por në asnjë mënyrë nuk duhet të përdorë për takimet e tij strukturën. Struktura është në funksion të qëllimit të përbashkët, jo për t’u bërë tabelë qitje e çdo deputeti”, thuhet në mesazhin e kryeministrit për deputetët.
Për Edi Ramën, PS është më e rëndësishme se çdo deputet, për këtë arsye ua ka ndaluar të vetëve që miqësitë ndërmjet tyre të përkthehen në vota preferenciale për kolegët që kryetari i ka hedhur në betejë të hapur.
“Deputetët në listë të mbyllur nuk duhet kategorikisht të kërkojnë vota për asnjë deputet në listën e hapur, po vetëm për numrin 5. Të gjithëve duhet t‘u thonë tek vota preferenciale jeni të lirë! Po ashtu deputetët në listën e hapur nuk është mirë t’u kërkojnë kolegëve në listën e mbyllur vota në zonën përkatëse, pasi e para i vënë në pozitë të vështirë, e dyta i shtyjnë drejt prishjes së barazisë së garës dhe e treta i bëjnë të çorodisin strukturën”, thekson kryesocialisti në mesazh.
Me këtë direktivë, një kandidat i PS, të cilit, nëse i është caktuar njësia 5 si zonë elektorale, nuk mund të kërkojë ndihëm e degës së PS në njësinë 4 për ta mbështetur me votë në 11 maj.
