Intervistoi: Reldar Dedaj*
Besart Xhaferri është kreu i të rinjve demokrat dhe pa drojë mund të themi është një prej aktorëve më kryesorë brenda Partisë Demokratike që ka ngulmuar që kjo forcë politike të ketë në programin e saj, si ide reale, krijimin e kushteve që jetesa e të rinjve në vend të lehtësohet. Sepse, beson fort, se pamja më e shëmtuar e kësaj mazhorance, përveç krimit dhe bashkëpunimit me të, është edhe braktisja e vendit nga të rinjtë. Xhaferri është shkolluar në Britaninë e Madhe, me një karrierë profesionale të shkëlqyer, ndërsa politikën e sheh më shumë si angazhim shoqëror dhe kjo është e vërtet.
Pse vendosët të merreshit me politikë apo, duke u marrë me të, “matematikisht”, mund të jesh më afër pushtetit. Çfarë do të thotë kjo për ju?
Reldar kam qenë nxënës i mirë në matematikë dhe shkencat ekzakte dhe më beso që shanset që unë të isha pranë këtij pushteti janë zero, se në këtë lojë nuk kam hyrë përmes diktimit, por me vullnet të lirë. Unë sot mund të isha në Angli ku kam kryer studimet dhe kam nisur sipërmarrjen, por ditën kur kam marrë vendimin për t’u rikthyer në Shqipëri e kam kuptuar se nuk e kam luksin të qëndroj indiferent përballë zhvillimeve në vendin tim, se jam rritur me bindjen se këtë tokë nuk e kemi trashëguar nga të parët tanë, por ua kemi borxh fëmijëve.
Unë kam aderuar adoleshent në Partinë Demokratike, pasi duke qenë një forcë e djathtë, ka në themel të programit të saj, familjen, traditën dhe kombin dhe këto kanë përkuar me vlerat e familjes në të cilën jam rritur. Kur flas për kombin të jemi të qartë, unë nuk e shoh nga Saranda në Tropojë, por nga Preveza në Luginë, teksa dy fëmijët e mi janë nipër në qytetin e Pejës.
Unë vij nga Skrapari, janë njerëz që gjithmonë e kanë çmuar lirinë dhe nuk kanë qëndruar kurrë pasiv kur koha ka lipsur kontributin e tyre, ndaj zgjedhja ime është krejt e natyrshme dhe në raport të drejtë me formimin tim. Unë gjykoj që Shqipëria ka kaluar një dekadë të tmerrshme, me një eksod prej 1 milionë banorësh, me një ekonomi të ekspozuar përballë krimit dhe përballë këtij realiteti, jo unë, por askush me pak ndërgjegje, nuk mund ti bashkohej këtij sekti që qeveris vendin që rrugës u kthye në një grup të strukturuar kriminal.
A e din ti Reldar se një çifti bashkëmoshatar me ne, i duhen rreth 70 vite kredi për të blerë një pronë dhe a është normale kjo, jo, pasi sot ndërtimi është kthyer në një sipërmarrje private të Edi Ramës, ku pastron paratë e inceneratorëve, të Ndranghetës dhe klaneve mafioze nga Meksika në Rumani. Janë me dhjetëra të rinj që më kanë kërkuar të ngre zërin dhe kam të paktën dy vite që e denoncoj këtë fakt dhe sot vë re që është kthyer në kryefjalë të debatit politik dhe mediatik. Për këto kauza kam vendosur të jem pjesë e politikës, që atë foltore Parlamenti të mos e shoh si foltore moçali, por tempull të fjalës që ka themel hallet e qytetarit.
Si mendoni, a ekzistojnë kushtet reale, sot, për një rotacion të pushtetit?
Shqipëria prej 2017 është në kushte emergjence për rrotacion dhe mungesa e rrotacionit të paktën 8 vitet fundit është shoqëruar me humbje të kapitalit me të madh që në kemi, njerëzve dhe kryesisht të rinjve. Kur domosdoshmërinë e rrotacionit e evidenton ish numri dy i kësaj qeverie, Arben Ahmetaj, që kanabizimin dhe pastrimin e parave i cilëson biznese private të familjes kryeministrore, çfarë mbetet për të thënë unë. Reldar ti je nga Mirdita, besoj i ke lexuar dosjet e SPAK, a s’të bënte përshtypje që Drejtori i Policisë Qarkut Lezhë kishte parcela kanabisi dhe ti e di si u përgjak Mirdita. Po në Berat 100 gra fasone, nëna fëmijësh punonin në një serë kanabisi.
Nuk është pyetja a janë kushtet reale për rrotacion, pyetja është a do duhet të ngrihen shqiptarët në lartësinë e detyrës për këtë mision fisnik, unë besoj se po dhe këtë e kam kuptuar përgjatë takimeve në mbarë vendin. Pak ditë më parë më ishim në Bulqizë, qytet me pasuri të paçmuara, teksa mjerimi shkëlqente në ato pak fasada të ndërtuara përgjatë këtyre viteve. Ata qytetarë ishin gati të bënin gjithçka për rrotacion, e ne jemi peng të atyre.
A ka potencial real Partia Demokratike për t’i dhënë të “shtymen” mazhorancës socialiste dhe nëse po, ku qëndron “Asi nën mëngë”, i kësaj alternative?
Nëse flasim për potencialin e Partisë Demokratike, duhet të kemi parasysh se po flasim për forcën politike që ka arritur jo pak suksese në drejtimin e vendit. Rruga e Kombit, kontributi për pavarësinë e Kosovës, infrastruktura rrugore dhe energjetike, liberalizimi i vizave, anëtarësimi në NATO dhe lufta kundër krimit të organizuar përgjatë viteve 2005-2009 janë arritje, efektet pozitive të së cilave i ndjeu çdo shqiptar dhe për herë të parë në historinë tonë patëm një valë rikthimi të emigrantëve përgjatë viteve 2008-2013, kryesisht nga Greqia dhe Italia. Unë besoj që asi nën mëngë i PD, përveç të shkuarës sonë, ku kemi dëshmuar se e çojmë vendin përpara, është konsistenca jonë për të mos lënë vendin të rrëshkasë në autokraci.
Nëse pas 2021 ne nuk do bënim atë luftë që bëmë, sot në vendin tim, ti mund të ishe duke intervistuar ndonjë deputet që do të fliste për veprat e artit të Edi Ramës që magjepsën Parisin. Ne jemi këtu për një mision, për ti dhënë mundësi qytetarëve shqiptarë të kenë alternative qeverisëse dinjitoze, dhe për tu thënë se ky vend nuk do merret peng as nga krimi as nga pakicat që kanë kryeqytet Beogradin.
Pse tek Partia Demokratike, pse kandidat për deputet i saj?
Nga viti 2013 deri në vitin 2023, Shqipëria ka humbur 254,402 të rinj në shkolla dhe auditorë universitar. Nga këta, 60 mijë studentë janë më pak në universitete dhe rreth 196 mijë nxënës janë më pak në sistemin paraunivetaristar dhe ciklin 9 vjeçar dhe fillor. Unë punoj më të rinjtë që studiojnë jashtë dhe kur ikin u lë vetëm një porosi, kthehuni në atdhe. Me aq sa më njihni, ju mendoni që unë do punoja për të mbajtur në pushtet një njeri që ka larguar nga vendi 254,402 të rinj.
Si e përkufizoni Sali Berishën?
Nuk hy tek ata që flas me superlativa për eprorin, por kur flasim për Sali Berishën, duhet të kemi parasysh se po flasim për një lider, që ka paguar një faturë të rëndë për angazhimin dhe kontributin e tij në politikë. Sali Berisha ka dëshmuar se e do prosperitetin e vendit të tij dhe qytetarëve të tij e të mos harrojmë shtëpia e tij në Tropojë ka qenë bazë e UÇK-së. Do kisha dashur që në politikën shqiptare të kishte pasur më shumë si, Sali Berisha, e pse jo një Rugovë, pasi standardi që ka vendosur Edi Rama si kryeministër, është një standard për të cilin do na gjykojë historia./Liberale.al
*Intervista elektorale është një rubrikë e përditshme e gazetës Liberale.al, në funksion jo vetëm të prezantimit të kandidatëve për deputet nga të gjitha subjektet politike në vend që garojnë në zgjedhjet e 11 Majit, 2025, por edhe ballafaqimit me ta, përfaqësimit dhe arsyes pse kandidojnë.
