Lulzim Basha kujton ditën historike kur më 1 Prill 2009 Shqipëria u pranua si anëtare me të drejta të plota të NATO-s dhe asokohe ai ishte në atë kohë ministër i Jashtëm.
Kreu i koalicionit Euroatlantik, Lulzim Basha kujton se me shumë vështirësi, siç shprehet ai, u vendos për të pranuar Shqipërinë në NATO. Sikurse edhe batutat që ndau me presidentin George W. Bush në atë moment historik. Pas mbledhjes dhe vendimit teksa takoi Bashën, Bush i është drejtuar - “mbledhje e vështirë” - siç kujton ish ministri i Jashtëm në një rrëfim, kur bëhen 16 vjet nga koha e anëtarësimit të Shqipërisë në NATO.
“President ti ke arritur gjëra të mira. Shqipëria dhe Kroacia u futën, Maqedonisë së Veriut iu hap rruga.”
-Po, më tha - kujton Basha, - “por duhej më shumë.”
“Ti ke futur më shumë vende në NATO se çka bërë Papa Gjon Pali shenjtorë” - ishte më tej batuta e bërë nga Basha i cili më tej kujton momentin e fiksuar nga kamerat kur Presidenti Bush qeshi dhe e kapi për supi duke e lëkundur në sy të të pranishmëve të tjerë.
Ishte edhe një ditë historike për Shqipërinë, shprehet Basha, kreu i koalicionit Euroantlantik. - “Të nënshkruaja, në emër të Shqipërisë, protokollet e anëtarësimit në Këshillin e Atlantikut të Veriut, ishte një nga përgjegjësitë më të mëdha dhe emocionet më të thella të jetës sime politike” - shprehet Basha përmes një postimi.
“Shqipëria vulosi një angazhim të palëkundur për lirinë, sigurinë dhe vlerat euroatlantike. Dhe u dëshmua para gjithë botës se, me gjithë vuajtjet dhe sakrificat, ne jemi një vend që di të ngrihet, që di të zgjedhë të ardhmen” theksoi më tej Basha sipas të cilit “mirënjohja jonë do të mbetet e përhershme për Presidentin George W. Bush, i cili me vizionin dhe mbështetjen e tij i dha një shtysë të fuqishme rrugëtimit tonë drejt NATO-s.”
“Sot, 16 vite më pas, kujtojmë jo thjesht një nënshkrim historik, por atë çka përfaqëson:
Besimin tek Shqipëria.
Besimin se vendi ynë mund të jetë i sigurt, i drejtë, i ndershëm dhe i begatë.
Besimin se historia nuk është vetëm kujtim, por udhërrëfyes për të ndërtuar më mirë të ardhmen.
Besoni tek Shqipëria. Sepse ky vend meriton më shumë - thotë Basha në mesazhin e tij.
