Intervistoi: Reldar Dedaj*
Akil Kraja është kandidat për deputet në qarkun Tiranë, në listën e Partisë Demokratike. Ai është një nga të paktët shqiptarë që ka studiuar në disa prej universiteteve më prestigjioze europiane, siç është SciencesPo në Paris, universiteti Bocconi në Milano, si dhe shkolla franceze e Administratës Publike – ENA. Ka një eksperiencë punë të larmishme si jashtë ashtu edhe brenda vendit. Aktualisht mban postin e Drejtorit të Kabinetit të kreut të PD-së, Sali Berisha.
Pse vendosët të merreshit me politikë apo, duke u marrë me të, “matematikisht”, mund të jesh më afër pushtetit. Çfarë do të thotë kjo për ju?
Pyetjes suaj mund t’i sjellim një korrektim të vogël. Pushteti “matematikisht” gjendet aty ku janë paratë. Duke punuar në pozicione senior në sektorin financiar, mendoj se isha më afër pushtetit dje teksa punoja në sektorin privat sesa jam sot i angazhuar në politikë, Kjo në sensin që me një financim mund të ndihmosh në krijimin e vendeve të punës më lehtësisht sesa çdo lloj mase ‘politike’. Përgjigja e këtij pasioni tim për politikën është e gjatë por sinteza më e mirë gjendet duke vizituar blogun tim personal www.akilkraja.al ku shpalos tezat e mia të Shqipërisë madhështore, të asaj çfarë është shekulli shqiptar, të hapësirës komb e të një vendi ku jetohet mirë, paguhesh mirë e trajtohesh mirë, madje më shumë se mire.
Si mendoni, a ekzistojnë kushtet reale, sot, për një rotacion të pushtetit?
Rotacioni është një domosdoshmëri, një mundësi dhe një kërkesë e qindra mijëra shqiptarëve si brenda ashtu dhe jashtë vendit. Mendoj që rotacioni është jetik për të çliruar energji të reja për ekonominë dhe shoqërinë shqiptare duke kaluar në një model të ri që respekton më shumë votuesin, taksapaguesin, qytetarin e njeriun. Hendeku mes elitave dhe çdo shtrese tjetër në Shqipëri është rritur në nivele si kurrë më parë dhe këtë gjë e shohim më së miri në sektorin e shëndetësisë dhe shërbimeve. Kjo duhet të marrë fund.
A ka potencial real Partia Demokratike për t’i dhënë të “shtymën” mazhorancës socialiste dhe nëse po, ku qëndron “Asi nën mëngë”, i kësaj alternative?
Vota e lirë është “asi nën mëngë” i çdo opozite. Sa më i lirë polici, arsimtari, nëpunësi civil apo punonjësi i bashkisë për të votuar pa presione, aq me e lirë do të jetë dhe gara zgjedhore. Prej 2013 Edi Rama u mbajt në pushtet nëpërmjet tjetërsimit të vullnetit të sovranit. Çmimi është eksodi biblik i 1.000.000 shqiptarëve në 10 vitet e fundit, kriminalizimi i ekonomisë dhe i mbarë administratës, një jetesë paradoksale me çmimet më të larta në rajon por pagat më të ulëta. Nga takimet e ndryshme në terren, konstatoj se qytetarët vijojnë të ndërgjegjësohen vit pas viti më shumë mbi peshën e votës së tyre.
Pse tek Partia Demokratike, pse kandidat për deputet i saj?
Sepse besoj tek forca e lirisë, e lirise së iniciativës së lirë, e lirisë ekonomike, politike e shoqërore. Besoj në një komb sipërmarrësish i cili sjell zhvillim kombëtar, besoj në një Shqipëri madhështore me infrastrukturë të ndërlidhur me Ballkanin e mbarë Bashkimin europian. Besoj në një shtet të vogël i cili është efecient në buxhetet që harxhon, modern në inovacionet që sjell, dhe efikas që zbatimin e politikave. Besoj se më 11 maj, programi ynë i sjell Shqipërisë mundësi krejt të reja për të rritur mirëqenien, cilësinë e jetesës, pagat, pensionet e shërbimin që marrim në vend. PD hoqi vizat, futi vendin në NATO, lidhi veriun me jugun me rrugë, rriti pagat e nivelin e investimeve në sektorin privat si asnjëherë më parë, solli 24 orë drita, promovoi internetin në vend etj. PD është një alternative qeverisëse e sprovuar tanimë për të arritur objektivë madhorë për mbarë kombin.
Si e përkufizoni Sali Berishën?
Duke punuar si Drejtor Kabineti i liderit të opozitës, kam patur shansin të kem kontakt ndryshe me të. Ndaj mund të konfirmoj lehtësisht një mit që nuk është mit. Berisha është një institucion, një enciklopedi kujtese, një motor i palodhshëm pune, një individ tolerant por njëherazi surprizues, inovator në fjalë po aq sa dhe në akte. Ai është përfaqësuesi par ekselencë i politikanit shumë dimensional i cili prodhon politikë si askush tjetër në hapësirën ballkanike, mbase dhe më gjerë./Liberale.al
*Intervista elektorale është një rubrikë e përditshme e gazetës Liberale.al, në funksion jo vetëm të prezantimit të kandidatëve për deputet nga të gjitha subjektet politike në vend që garojnë në zgjedhjet e 11 Majit, 2025, por edhe ballafaqimit me ta, përfaqësimit dhe arsyes pse kandidojnë.
