Policia e Fushë-Krujës ka zbuluar dhe goditur një grup kriminal të dyshuar për disa vjedhje të ndodhura gjatë këtij viti.
Në pranga kanë rënë Aleksandër Bushgjoka, 24 vjeç, i cili ishte në kërkim edhe për veprat penale “Shkatërrim prone” dhe “Largim nga vendi i aksidentit”, si dhe Gani Lamaj, 33 vjeç, dhe Kriste Bushgjokaj, 29 vjeç.
Ky i fundit u kap në flagrancë duke drejtuar një automjet të marrë me qira, që dyshohet se është përdorur në grabitjet e kryera.
Një tjetër anëtar i grupit, Admiral Murataj, ndodhet tashmë në burg, ndërsa tre persona të tjerë janë shpallur në kërkim.
Sipas hetimeve, grupi ka kryer disa vjedhje në datat 27 dhe 28 mars, duke grabitur 16,000 lekë në një pikë transfertash dhe 21 celularë në një dyqan.
Policia ka sekuestruar një automjet si provë materiale dhe po vijon hetimet, duke analizuar telefonat e të arrestuarve për të identifikuar të tjerë të përfshirë në aktivitetin kriminal.
