Globi

Pamje shokuese/ 23- vjeçari sulmohet nga peshkaqeni, ai thirri 'babi' dhe më pas u zhduk nën ujë

Shkruar nga Liberale
Përpjekjet e dhimbshme të një 23-vjeçari rus, i cili po përpiqej të shpëtonte nga një peshkaqen që e kishte rrëmbyer në një plazh turistik në Egjipt, është regjistruar në një video që po qarkullon në internet që prej ditës së djeshme. Në pamje, i riu rus i quajtur Vladimir Popov shihet duke notuar, kur papritur peshkaqeni tigër e rrethon dhe e sulmon, ndërsa gradualisht uji rreth tij filloi të skuqej. Menjëherë pas vdekjes së 23-vjeçarit, peshkaqeni u kap nga peshkatarët vendas dhe u tërhoq zvarrë në breg, ku turma e goditi për vdekje me shkopinj. Siç u bë e ditur, Popov ka qenë në plazh me të atin, i cili ka parë skenën tragjike para syve të tij, ku djali i tij thërriste në mënyrë të dëshpëruar “Babi” teksa përpiqej t’i shpëtonte nofullave të peshkaqenit. Në video shihet trupi i 23-vjeçarit duke hyrë e dalë nga uji, ndërsa këmbët i rrotullohen në ajër. Një zhytës që mbërriti në vendngjarje menjëherë pas sulmit tha se njerëzit nxituan për të ndihmuar viktimën pasi një roje plazhi nga një hotel aty pranë ngriti alarmin, por për fat të keq ata ishin shumë vonë. Konsulli i përgjithshëm i Rusisë në Egjipt i tha agjencisë shtetërore të lajmeve TASS se autoritetet egjiptiane i kishin konfirmuar vdekjen e shtetasit rus i lindur në vitin 1999. "Viktima nuk ishte një turist, por një banor i përhershëm i Egjiptit", tha konsulli. “Shkuam në plazh për t'u çlodhur. Djali im u sulmua nga një peshkaqen, gjithçka ndodhi në sekonda. Çfarë lloj ndihme mund të jepja? Masakra ndodhi brenda 20 sekondave, vetëm e tërhoqi zvarrë nën ujë”, tha babai i viktimës, Yuri Popov. E dashura e Vladimir Popov kishte arritur të dilte nga uji para sulmit të peshkaqenit, sipas asaj që shtoi babai i 23-vjeçarit. Një dëshmitar i tha stacionit rus REN-TV: “Kjo ndodhi në sekonda. Ekipet e shpëtimit kanë reaguar shumë shpejt. Për disa arsye, menjëherë ndjeva se ishte një peshkaqen. Unë u hodha menjëherë dhe fillova të bërtas: "Peshkaqenë, peshkaqenë! Shpëtoni veten! Askush nuk kishte kuptuar asgjë". Autoritetet thanë se peshkaqeni u kap dhe u dërgua në një laborator "për ekzaminim dhe të gjithë informacionin e kërkuar për të përcaktuar shkaqet e mundshme të sulmit..."./Liberale.al

Liberale Newsroom

Poll
SHQIPENGLISH