Kryesore

“Non Grata” si mjet kundër korrupsionit

               Publikuar në : 10:07 - 01/07/21 liberale

Gjatë vizitës në Tiranë, Ndihmës/Sekretari Amerikan për Çështjet Europiane dhe Euroaziatike, Philip Reeker përcolli vendosmërinë e ShBA në luftën kundër korrupsionit. Në takimet me Ramën dhe Bashën theksoi se kjo luftë do të vijojë përmes konfiskimit të pasurive dhe caktimeve “non grata” të të gjithë atyre zyrtarëve të përfshirë në korrupsion madhor dhe minim të demokracisë

Shtetet e Bashkuara të Amerikës janë të vendosura të theksojnë luftën kundër korrupsionit në Shqipëri e në të gjithë Ballkanin Perëndimor.

Pak ditë pas urdhrit të Joe Biden për konfiskim të pronave dhe ndalim të hyrjes në ShBA të personave të përfshirë në korrupsion dhe në destabilizimin e demokracisë, Ndihmës Sekretari Amerikan për Çështjet Evropiane dhe Euroaziatike, Philip Reeker mbërriti në Tiranë, si stacioni i parë i vizitave në rajon për të përforcuar edhe më shumë mesazhin e presidentit Joe Biden.

Me të mbërritur, Reeker u takua me kryeministrin Rama, ndërsa biseda nuk u shoqërua me një konferencë të përbashkët për mediat. Deklarata nuk pati as nga selia blu, pasi zyrtari i lartë amerikan u takua me kryedemokratin Basha.

Ishte Ambasada e ShBA-së në Tiranë, që përmes një njoftimi zbuloi fokusin e bisedimeve në të dy takimet.

“Ai nënvizoi vendosmërinë e Presidentit Biden dhe Sekretarit të Shtetit Blinken se lufta kundër korrupsionit, përfshirë përmes përcaktimeve publike për korrupsion madhor sipas Nenit 7031(c) të Departamentit të Shtetit për Operacionet e Jashtme, dhe Programet Përkatëse të Nenit mbi Përvetësimet 2021, është një interes thelbësor i sigurisë kombëtare për Shtetet e Bashkuara”, bëri me dije ambasada, ndërsa në të gjithë takimet Reeker ishte i shoqëruar nga ambasadorja Yuri Kim.

Kjo vizitë e ndihmës/ sekretarit amerikan erdhi pasi Sekretari i Shtetit, Blinken caktoi publikisht si “non grata” ish-presidentin dhe ish-kryeministrin Berisha për përfshirje në korrupsion dhe minim të demokracisë, gjatë kohës kur ky shërbeu si kreu i qeverisë shqiptare.

Berisha vendosi të ngrejë padi kundër sekretarit Blinken, me pretendimin se i ishte cenuar reputacioni dhe se ky caktim vinte tetë vite, pasi ai nuk ushtron asnjë funksion zyrtar.

Basha bëri thirrje për transparencë të plotë të këtij caktimi, por u kujdes të theksonte se Partia Demokratike e sheh ShBA-në si aleate të madhe dhe se është e përkushtuar në luftën kundër korrupsionit dhe krimit të organizuar.

Ky caktim publik i Berishës ishte ai i zyrtarit më të lartë shqiptar që shpallet “non grata” nga ShBA pas ish Prokurorit të Përgjithshëm Llalla, kryebashkiakut të Durrësit Dako dhe kreut të PSD-së Tom Doshi.

Sipas DASh janë shumë zyrtarë “non grata” në ShBA, por jo të gjithë janë bërë publike për opinionin. Reeker u takua edhe me ministren e Jashtme, ministren e Drejtësisë dhe ministrin e Mbrojtjes.

Ndërsa në këtë vizitë zyrtare Reeker u takua me kreun e qeverisë dhe liderin e partisë më të madhe opozitare, në agjendë nuk ishte parashikuar një takim me kreun e shtetit, Ilir Meta.

Ky i fundit kritikoi vendimin e shpalljes “non grata” të Berishës pak kohë më parë, ndërsa u përfshi gjatë fushatës zgjedhore në një debat me ambasadoren Yuri Kim.

Zonja Kim i kritikoi hapur mesazhet e Metës për mbrojtjen e votës me “sfurqe” dhe kreu i shtetit i përcolli gjatë një interviste televizive përgjigjen që të mos futej në punët e brendshme të vendit.

Ky mesazh i presidentit ishte një shtysë që 40 deputetë të maxhorancës të nisnin kërkesën për shkarkimin e tij, me pretendimin e shkeljes së rëndë të Kushtetutës.

Në këtë vizitë Reeker është takuar edhe me disa prej anëtarëve të verifikuar plotësisht të sistemit të drejtësisë në Shqipëri, si dhe udhëheqës të tjerë.

“Ndihmës Sekretari i Shtetit Reeker dhe ambasadorja Kim u takuan me gjyqtarë dhe prokurorë që shënojnë një epokë të re të Drejtësisë shqiptare. Këta magjistratë u zgjodhën sepse përfaqësojnë ata që kanë përmbushur nivelin e integritetit dhe profesionalizimit qoftë duke plotësuar kërkesat e reja rigoroze për t’u bërë shërbëtorë të drejtësisë shqiptare, ose duke kaluar procesin e vështirë por të nevojshëm të vettingut”, do të shprehej një zëdhënës i ambasadës amerikane.

Ndihmës Sekretari në Detyrë përsëriti mbështetjen e fortë të Shteteve të Bashkuara për reformat në sistemin e drejtësisë dhe në luftën kundër krimit të organizuar, duke nënvizuar se si përparimi në këto çështje do të nxisë demokracinë, mbrojtjen dhe biznesin në Shqipëri dhe do të vijojë rrugën e Shqipërisë drejt pranimit në Bashkimin Europian.

Reformimi i Sistemit të Drejtësisë dhe rezultatet e prekshme, veçanërisht në numrin e zyrtarëve të lartë të ndëshkuar për korrupsion, është një nga kushtet kyçe të BE-së për çeljen e negociatave, ndonëse vendimi për Konferencën e parë Ndërqeveritare është shtyrë për më vonë.

Ndërsa ShBA si investitorja më e madhe e Reformës në Drejtësi pret frytet e saj në sistem, ka gjetur edhe rrugë të tjera për të luftuar korrupsionin në Shqipëri dhe rajon, përmes urdhrit të qartë të presidentit Biden që i sheh zyrtarët e përshirë në korrupsion dhe në minim të demokracisë jo vetëm si pengues të integrimit në institucionet euro-atlantike, por edhe si rrezik për sigurinë kombëtare të ShBA. Me këtë urdhër caktimi “non grata” është një mjet për ta luftuar korrupsionin, ndonëse deri më tani emrat publikë janë të ish-zyrtarëve që nuk kryejnë funksione aktive. Përmes Reeker që erdhi ta theksojë në terren mesazhin e presidentit Biden dhe Sekretarit Blinken, ShBA duket se lajmëron të tjerë caktime për zyrtarë të përfshirë në korrupsion madhor e që në të ardhmen, ashtu si në rastin e ish-kryeprokurorit Llalla mund të kthehen në subjekte të organeve të Drejtësisë.

Urdhri

Biden: Bllokim prone dhe ndalim i hyrjes në SHBA për ata që kontribuojnë në destabilizimin e Ballkanit Perëndimor

 Presidenti Amerikan Joe Biden nxori një urdhër të ri ekzekutiv që përfshin Ballkanin Perëndimor, i cili parashikon bllokimin e pronave dhe ndalim të hyrjes në SHBA të personave që kontribuojnë në destabilizimin e Ballkanit Perëndimor.

Ky urdhër i publikuar sot në 8 qershor përfshin ish-vendet e Federatës Jugosllave dhe Shqipërinë. Sipas Biden gjatë dy dekadave të fundit ka pasur minim të marrëveshjeve, institucioneve, korrupsion brenda qeverive dhe institucioneve, që kërcënon sigurinë kombëtare dhe politikën e jashtme të SHBA.

“Duke qenë se situata në territorin e ish Republikës Socialiste Federale të Jugosllavisë dhe Republikës së Shqipërisë (Ballkani Perëndimor), gjatë dy dekadave të fundit, duke përfshirë minimin e marrëveshjeve dhe institucioneve të pasluftës pas prishjes së ish Republikës Federale Socialiste të Jugosllavisë, si dhe korrupsionit të përhapur brenda qeverive dhe institucioneve të ndryshme në Ballkanin Perendimor, pengon progresin drejt qeverisjes efektive dhe demokratike dhe integrimin e plotë në institucionet transatlantike, dhe në këtë mënyrë përbën një kërcënim i pazakontë për sigurinë kombëtare dhe politikën e jashtme të Shteteve të Bashkuara”, thuhet ndër të tjera në urdhrin e firmosur nga Biden.

Sipas urdhrit ekzekutiv të firmosur nga Biden, përfshihen personat që kontribuojnë në kërcënimin e paqes, sigurisë, stabilitetit ose integritetit territorial të çdo zone ose shteti, përgjegjës ose bashkëpunëtor, ose të përfshihesh drejtpërdrejt ose indirekt në veprime ose politika që minojnë proceset demokratike ose institucionet në Ballkanin Perëndimor.

Ambasadorja e SHBA-së në Tiranë, Yuri Kim përshëndeti urdhërin e Biden duke shkruar në profilin e saj zyrtar në Tëitter se:Lufta ndaj korrupsionit është një interes thelbësor i sigurisë kombëtare të SHBA.

Sekretari amerikan i Shtetit: Korrupsioni kërcënon barazinë ekonomike

Sekretari amerikan i Shtetit, Antony Blinken ripohon angazhimin e Uashingtonit për të luftuar korrupsionin në vendet e Ballkanit Perëndimor.

“Shtetet e Bashkuara janë të ndërgjegjshme se korrupsioni kërcënon barazinë ekonomike, luftën kundër varfërisë, përpjekjet për zhvillimin ekonomik, si dhe vetë demokracinë. Korrupsioni, kudo që të jetë, dëmton drejtpërdrejtë politikën e jashtme, sigurinë kombëtare dhe ekonominë e Shteteve të Bashkuara, si dhe aleatët e partnerët tanë”, thekson zoti Blinken, në një deklaratë të lëshuar pas Urdhërit Ekzekutiv të Presidentit Biden për të zgjeruar hartën dhe kriteret e vendosjes së sanksioneve ndaj individëve dhe organizatave që përfshihen në korrupsion dhe krim të organizuar në Ballkanin Perëndimor.

“Shtetet e Bashkuara”, thekson zoti Blinken, “janë të angazhuara për të nxitur llogaridhënien si dhe për të luftuar pandëshkueshmërinë ndaj atyre që janë përfshirë në raste madhore korrupsioni në Ballkanin Perëndimor dhe kudo në botë”.

Duke e shpallur luftën kundër korrupsionit si një prioritet të sigurisë kombëtare të Shteteve të Bashkuara, administrata Biden duket se është e përgatitur të mbajë ndaj individëve, që beson se përfshihen në akte madhore korrupsioni dhe që minojnë shtetin ligjor, të njejtin qëndrim si ndaj atyre që kanë rrezikuar paqen në Ballkanin Perëndimor.

 

 

Tags: , , , , ,


KOMENTO (0)

Shkruaj nje koment

Your email address will not be published. Required fields are marked *

* *

Back