Kompania koreano-jugore e tregtisë elektronike Coupang ka vendosur të anulojë koncertin e reperit të njohur Kanye West, i planifikuar për në fund të majit në Korenë e Jugut.
Sipas njoftimit të dhënë nga Coupang dhe platforma e shitjes së biletave Interpark, vendimi është marrë për shkak të polemikave të fundit që përfshijnë artistin, i cili tashmë njihet me emrin Ye.
Nuk janë dhënë shumë detaje, por polemika më e fundit lidhet me një këngë të re të titulluar “Heil Hitler”, në të cilën Kanye përmend dhe vlerëson Adolf Hitlerin, liderin nazist përgjegjës për Holokaustin.
Organizatorët nuk kanë bërë të ditur nëse koncerti do të shtyhet apo anulohet përfundimisht, por theksojnë se vendimi është marrë për të shmangur përfshirjen në polemika që dëmtojnë imazhin publik.
