Reldar Dedaj

Edi Rama, jo vetëm ka dështuar ta bëjë shtetin dhe shoqërinë e dëshirave dhe ëndrrave të të rinjve tanë, por s’ka qenë në gjendje as të identifikojë rreshqitjen graduale të Shqipërisë në një mentalitet kriminal.

Shfaqja e përsëritur e personave me rekorde kriminale në skenë të hapur më shumë është pasojë e trimërimit dhe e karshëllekut që njerëz të tillë i bëjnë shtetit dhe opinionit publik, sesa nënshtrim ndaj tij. Tani ata haptas po e sfidojnë jo më Shqipërinë si shtet, por edhe shoqërinë shqiptare në tërësi.

Shqiptarët i gjen gjithmonë të gatshëm të përfshihen në zënka politike, por nuk janë asnjëherë në gjendje të flasin për një fenomen të tillë, i cili është sa shoqëror aq dhe kultoror, siç është krimi i organizuar në vend.

Ka edhe nga ata gazetarë të ndryshëm, me ose pa karizëm publik, të cilët shfaqen të gatshëm të përfshihen në debate të ndryshme, madje edhe duke treguar se kush me kë e kalon natën, por nuk janë të gatshëm të përballen me një sfidë të këtillë. Pse, a kanë frikë? Po.

Në sfondin e tragjedisë së Himarës, nuk është kaq e vështirë për të kuptuar, se cilët janë ata që kanë marrë licensë për të betonizuar jugun, kush i ka hotelet, restorantet luksoze, skafet e gomonet pa leje. Madje edhe kush i ndan e kush i merr hapësirat për plazhe private. Të gjitha lidhjet, politike apo kriminale, të çojnë te PS-ja.

Ta merr mendja se Shqipëria, ndryshe nga çdo vend tjetër i botës, ka mbetur pa asnjë idealist? Para tridhjetë vitesh, Shqipëria u bë demokratike, por tashmë askush nuk e çan kokën për vlerën e kësaj demokracie, sepse ajo është zhgënjyese deri në pendesë. Idealistët e orëve të para u bënë pushtetarë, e pushteti dalëngadalë u shndërrua në fitim dhe biznes. Duke krijuar kështu, rrugën më të shkurtër, nga politika tek korrupsioni.

Nga ana tjetër, klasa jonë politike, trimërohet ndaj medias; fyen dhe shan këdo gazetar që i prek bishtin. Por klasa jonë politike është në masë e prapambetur, e padijshme, e korruptuar, e çoroditur. Në këtë pikë nuk ka ndonjë ndryshim ndërmjet partive politike. Të gjithë e dimë se klasa jonë politike prodhon institucione të brishta, gjeneron krizë, riciklon korrupsionin, është edhe e lidhur me krimin e organizuar.

Pasqyrë e këtij regjimi është ulja e banditëve me oficerët e Policisë së Shtetit, të cilët, duke ngrënë dhe pirë bashkë, ndajnë plaçkën e zgjedhjeve, ku kriminelët kontrollojnë qytete, marrin tendera e vënë nën urdhëra policinë, sepse i shërbejnë Edi Ramës ditën e zgjedhjeve.

Mirëpo, në gjithë këtë histori, të gjithë pa përjashtim bëjnë të pafajshmin, të paditurin, të gjithë i lajnë duart si Ponc Pilati./Liberale.al/