Rrathët në ujë nuk formohen vetë, duhet hedhur një gur. E pikërisht, si ky gur është projekti ambicioz, që u prezantua më 21 shkurt 2020, në Tiranë. Ai quhet “Evropa për Rininë Shqiptare – Europe for Albanian Youth” (EU4AL). Financohet nga Bashkimi Evropian, ndërsa implementimi realizohet nga Qendra për Komunikim e Praktikave të Përgjegjshme.
Qëllimi është, që të rinjtë të kuptojnë ç’është BE-ja, pranimi në të, të kontribuojnë në procesin e integrimit të vendit dhe të brendësojnë vlerat dhe parimet e BE-së. Adoleshentët do të kenë mundësi të zhvillojnë aftësitë e tyre pjesëmarrëse dhe udhëheqëse, duke marrë pjesë në aktivitete, që kanë lidhje me procesin e integrimit në BE.
Në takimim prezantues morën pjesë mësues dhe drejtorë shkollash te mesme, si dhe nxënës nga institucione arsimore publike e private. Projekti do të shtrihet në 4 qarqe të vendit, që janë Shkodra, Tirana, Vlora dhe Korça.
Ai i ngjan një udhëtimi nëpër disa etapa, ku parashikohen trajnime të të rinjve mbi kërkimin dhe argumentimin, të menduarit kritik dhe aftësitë e të folurit publik. Do të ketë sesione informuese në shkollat e mesme, në lidhje me rolin e të rinjve në BE, kjo përmes prezantimeve vizuale, broshurave informuese, posterave si dhe elementeve të tjera informuese.
Anketime do të kryhen në 4 qarqet, për të vlerësuar perceptimin e të rinjve, në lidhje me procesin e integrimit europian dhe rolin që kanë ata në këtë proces.
Të rinjtë do të kenë mundësi të përfshihen nëpër debate publike, sipas modelit të filozofit Karl Poper. Fillimisht ndërmjet shkollave të një qarku, e më pas mes fituesve të 4 qarqeve.
Një garë interesante ku nuk ka humbës, por fitues të aftësive për të zhvilluar strategji debati, me etikë dhe punë në grup. Fituesit e debatit publik do të shpërblehen me çmime simbolike.
Kampi rinor (Europe4Al) 5 ditor, që do të organizohet në Shqipëri, do të ketë në përbërje grupe rinore shqiptare dhe nga vende të BE-së. Kjo për të inkurajuar angazhimin vullnetar, të mësuarit në lëvizje, solidaritetin dhe mirëkuptimin ndërkulturor. Prej aty të rinjtë do të ngrenë një platformë dixhitale, përmes së cilës, të rinjtë brenda kampit, do të ndërveprojnë me moshatarët e tyre jashtë kampit, për të mbledhur qëndrimet e tyre, në lidhje me integrimin në BE dhe rolin, që do të kenë të gjithë bashkë në proces. Ata do të shndërrohen në atë “gurin”, që do të përhapë valët e njohurive tek bashkëmoshatarët.
Projekti është ambicioz edhe për faktin, që një dokument final me rekomandime, për rolin e të rinjve në procesin e integrimit në Shqipëri, do të prodhohet si rezultat i aktiviteteve. Me menaxherët e projektit do të punohet që të lobohet pranë Ministrisë së Arsimit, Qeverisë dhe Kuvendit, që këto rekomandime të integrohen në ligj dhe akte nënligjore.
Të rinj të pranishëm në aktivitetin prezantues pyetën se, përse shërben një projekt i tillë, në një kohë kur shumë moshatarë të tyre, i kanë kthyer sytë nga Europa dhe synojnë çdo ditë e më shumë shkollimin dhe punësimin atje.
Drejtuesja e projektit, zonja Marinela Dervishi, ju përgjigj se, qëllimi është sa informimi aq edhe nxitja e të rinjve të shikojnë potenciale ndërtimi në vendin e tyre, pasi janë e ardhmja dhe vetëm ata mund ta bëjnë këtë vend, si Europa. Në fund të fundit, “Guri i rëndë në vend të vet”, thotë populli.
Aktivitetet e projektit do të zbahohen gjatë një afati kohor prej 16 muajsh, me një shtrirje kalendarike Tetor 2019 – Janar 2021.
