Një avion i linjës American Airlines u detyrua të bëjë një ulje emergjente menjëherë pas ngritjes nga aeroporti ndërkombëtar Harry Reid në Las Vegas, për shkak të tymit dhe flakëve që u panë duke dalë nga njëri prej motorëve të tij.
Fluturimi AA1665 ishte nisur drejt Charlotte, Karolina e Veriut, në orën 08:11 të mëngjesit me orën lokale, por u kthye menjëherë në aeroport pasi u raportua tym në motorin e majtë, raportoi CBS.
Në bord ndodheshin 153 pasagjerë dhe 6 anëtarë të ekuipazhit, të cilët zbritën në mënyrë të sigurt pas uljes. Pamjet e publikuara në rrjetet sociale tregojnë flakë dhe tym që dilnin nga motori.
View this post on Instagram
Megjithatë, American Airlines tha se pas një inspektimi të mëvonshëm, ekipi i mirëmbajtjes nuk gjeti prova që motori të kishte marrë flakë vërtet.
“Avioni u rrotullua vetë deri te porta dhe pasagjerët zbritën normalisht,” tha kompania në një deklaratë zyrtare, duke falënderuar ekuipazhin për profesionalizmin.
Avioni, një Airbus A321, është nxjerrë nga shërbimi për inspektim të mëtejshëm, ndërsa Administrata Federale e Aviacionit (FAA) ka nisur hetimet mbi incidentin.
