Askush nuk ju bën të ndiheni inferiorë, pa miratimin tuaj, - thoshte dikur ish-zonja e parë e Shteteve të Bashkuara të Amerikës, Eleonor Rusvelt. “CSR Communication Center” organizoi më 23 dhe 24 Dhjetor një trajnim zhvillimi personal & lidershipi për të rinjtë shqiptarë.
Në kuadër të projektit “EU4AL - Europa për të Rinjtë Shqiptarë”, në të morën pjesë 20 të rinj nga mosha 14 deri në 18 vjeç, financuar nga Delegacioni i BE në Shqipëri. “SHINE”, shkëlqe në ngjyrat e tua, ishte mesazhi që ju përcoll pjesëmarrësve, në aktivitetet dyditore. U identifikua larmia e personaliteteve në përbërje të grupit, u nxorën në pah vlerat e secilit qëndrim, por mbi të gjitha, u integruan gjithë ngjyrat e këtyre të rinjve premtues, në një grup harmonik. Grup, i cili nëpërmjet pjesëmarrjes aktive në ndërthurjen e elementëve të edukimit jo formal, arritën të përthithnin mesazhet e synuara, lidhur me lidershipin, BE-në & qytetarinë aktive dhe vullnetarizmin, si dhe të informohen për mundësi që ju ofrohen për zhvillimin personal, në aspektin akademik dhe joformal.
Tajnimi ishte konceptuar për të qenë interaktiv dhe për t’ju mësuar përmes informacionit edukativ, videove, ushtrimeve, lojërave, teatrit, reflektimit, diskutimeve dhe shembujve konkretë, se çfarë do të thotë të jesh një lider, cilësitë e nevojshme për të qenë i tillë, si të përçosh vlerat dhe shembullin tënd personal tek të tjerët.
“Lider lind, nuk bëhesh” është një shprehje, që nxiti diskutime mes 20 të rinjve. Ata u ndanë në tre grupe, bazuar në atë se sa dakord binin, në lidhje me të, dhe shumica ishin pak a shumë dakord. Arbasi, 16 vjeç nga gjimnazi “Sami Frashëri” në Tiranë, shprehet: “Kur marr pjesë në trajnime të tilla, më krijohet perceptimi, se në mua shtypet një buton, që më kthen në një njeri tjetër, sepse i marr gjërat më seriozisht, sillem në mënyrë më të pjekur me të tjerët, madje ka ndryshime edhe në fjalët që zgjedh, që nuk janë nga zhargoni i përditshëm”. Arbasi vlerësoi edhe zhvillimin e elokuencës në trajnime të tilla.
Një nga ushtrimet ishte “Bëj çfarë them unë dhe thuaj çfarë them unë”.
Lideri jepte një komandë, dhe të tjerët e ndiqnin duke përsëritur në mënyrë vokale komandën e tij. Alisa, 15 vjeçe, tregoi përvojën personale dhe të të gjithë shkollës në fushatën, që organizuan brenda një dite, për mbledhjen e ndihmave për familjet, që u goditën nga tërmeti shkatërrimtar i 26 nëntorit. Ndihmat i çuan vetë ata, në qytetin e Laçit. Ajo tregoi, se u ndje shumë e plotësuar, që ofroi ndihma dhe dha kohën e saj. Në këmbim, mori emocione dhe mësime shumë të forta, për mënyrën se si problemet e mëdha, zgjidhen me solidaritet.
Mësova të bëj punë falas dhe të jem njëkohësisht e domosdoshme për një njeri në nevojë. Dezi u shpreh, se puna në grup, i rrit asaj besimin në aftësitë e veta dhe i zhvillon komunikimin, duke qenë një vajzë paksa e turpshme. Një lojë tjetër ishte ndërtimi i një kulle me kuba me sytë mbyllur, me instruksione që jepeshin nga lideri dhe pjesëtarët e tjerë të grupit. Kristiana me sytë mbyllur ndërtoi kullën më të gjatë, pasi grupi ishte suportues dhe i qartë në udhëzime, jo kaotik.
Një ushtrim ishte veçimi i 5 ngjarjeve kyçe të jetës. Vajzat e djemtë, përmendën ngjarje të tilla si, kalimi nga 9-vjeçarja në gjimnaz, pjesëmarrja në këtë trajnim, punët vullnetare të kryera në shkollë, mbledhja e ndihmave për të prekurit nga tërmeti etj. Të rinjve ju mësuan disa receta të suksesshme, se si të përmirësojnë aftësitë e lidershipit: Reflektoni dhe identifikoni aftësitë që ju duhen të udhëhiqni. Bëni plane afatgjata. Vetëmonitorohuni nëpërmjet vlerësimeve kritike Praktikë! Merrni përgjegjësi (punë vullnetare, klube dhe shoqëri). Gjeni një mentor - mësoni nga modelet e roleve pozitive të udhëheqjes. Merrni pjesë në trajnime të mëtejshme për Lidership dhe Zhvillim të vetes.
Pyetjes se cili është sekreti i një lideri, ju dha përgjigje përgjatë ushtrimeve, bisedave dhe ndërveprimit social, të 20 të rinjve. Ata mësuan se liderët: Përshtaten me lehtësi, janë të gatshëm, janë të prirur drejt arritjeve, janë bashkëpunues, të vendosur, të besueshëm, dominant, dinamikë, këmbëngulës, të sigurtë në vetvete, tolerantë ndaj stresit, marrin përgjegjësi, të zgjuar, kreativë, diplomatë dhe me takt, oratorë, kanë njohuri për çdo detyrë/aktivitet të grupit, janë të organizuar dhe bindës.
Kishte nga ana adoleshentë që pyesnin, se cilat janë stilet më të suksesshme të udhëheqjes. Në fund, si pa e kuptuar morën përgjigje, se nuk është stili autokratik, por ai bindës, këshillues e demokratik, që ka rezultuar më frytdhënës.
Mbi të gjitha: Liderët përdorin Integritet, Ndershmëri, Dhembshuri e Përulësi.
Julia Mezini
[gallery columns="1" size="full" ids="1114060,1114062,1114061"]
