Pas muajsh thashetheme dhe spekulimesh, duket se marrëdhënia mes yllit të pop-it Billie Eilish dhe aktorit/muzikantit Nat Wolff nuk është më sekret. Dyshja është fotografuar duke kaluar momente të ngrohta dhe intime në një ballkon romantik në Venecia, duke konfirmuar për herë të parë lidhjen e tyre në mënyrë publike.

Sipas burimeve të Deuxmoi dhe fotove që tashmë kanë bërë xhiron e rrjetit, Billie dhe Nat shfaqen duke shkëmbyer puthje të ëmbla dhe çaste relaksi nën diellin italian. Billie, e veshur me një bluzë bardh e zi dhe flokë të gjatë të lëshuar mbi shpatulla, dukej më e lumtur se kurrë. Ndërsa Nat mbante një bluzë gri, dhe bashkë me këngëtaren shijuan pije të gazuara dhe bënë selfie plot dashuri.

Ky afrim i qartë duket se i jep fund heshtjes rreth marrëdhënies së tyre, e cila ka qenë në qendër të vëmendjes që nga mars 2025, kur fansat filluan të dyshonin për një lidhje romantike mes tyre. Por kjo është hera e parë që çifti shfaqet kaq hapur dhe pa hezitim në publik.

Megjithatë, vetë Billie ka qenë gjithmonë e rezervuar për jetën e saj personale. Në një intervistë për Vogue vitin e kaluar, ajo deklaroi qartë:

"Do të doja që askush të mos dinte asgjë për seksualitetin tim apo për jetën time të takimeve. Kurrë. Dhe nuk do të flas kurrë më për këtë."
Nga ana tjetër, Nat Wolff është i njohur për karrierën e tij si fëmijë aktor dhe muzikant, duke debutuar në serialin kult të Nickelodeon "The Naked Brothers Band" së bashku me vëllain e tij Alex Wolff. Sipas EOnline.com, Billie fillimisht u takua me Alex në vitin 2023 dhe më pas u njoh me Nat – lidhje që ka evoluar si profesionalisht, ashtu edhe personalisht.

Në një intervistë të fundit për Vogue me Alex, Billie komentoi me dashuri për familjen Wolff:

“Familja jote është fjalë për fjalë gjëja më e mirë që më ka ndodhur ndonjëherë.”