Marrëdhëniet mes Princ Harry-t dhe familjes mbretërore vazhdojnë të jenë të tensionuara, ndërsa ai dhe bashkëshortja e tij, Meghan Markle, ndjekin qasje të ndryshme ndaj situatës.

Sipas një burimi për revistën People, Meghan po përpiqet të fokusohet te e ardhmja dhe e trajton situatën me “qetësi dhe profesionalizëm”, ndërsa Harry duket ende i lidhur fort me të kaluarën dhe ndarjen nga familja.

Meghan, e cila nuk është kthyer në Mbretërinë e Bashkuar që nga funerali i Mbretëreshës Elizabeth në vitin 2022, shpreson që burri i saj të jetë më pak i ngarkuar emocionalisht dhe të përqendrohet në jetën e re që kanë ndërtuar bashkë në SHBA.

Çifti hoqi dorë nga detyrat mbretërore në vitin 2020 dhe u zhvendos në Kaliforni, duke shkaktuar përçarje me pjesëtarët e tjerë të familjes, përfshirë Mbretin Charles dhe Princin William.

Aktualisht, Harry ka një marrëdhënie të ftohtë me të atin. Në një intervistë për BBC, ai u shpreh se Charles “nuk pranon të flasë me të”. Burime mbretërore thonë se mbreti, i cili po lufton me kancerin, “nuk i beson më” djalit të tij pas deklaratave publike dhe botimit të librit autobiografik Spare në vitin 2023.

Marrëdhënia me vëllain e tij, Princ William, është po ashtu e tensionuar. Edhe pse të dy morën pjesë në disa ceremoni në 2023 dhe 2024, nuk kanë pasur kontakte të ngushta. Një burim për Us Weekly tha se William është “i lodhur” dhe “ka hequr dorë nga përpjekjet për të rregulluar marrëdhënien”.