Dita e parë e shkollës largon ministren e Arsimit

Besa Shahini me një karrierë politike tek “Vetëvendosja” në Kosovë mbeti një eksperiment jo i suksesshëm politik në Tiranë. Dhe kjo jo për faj të shqiptarëve, por për shkak të majtizmit të ish ministres, e cila edhe dje pranoi se është më e majtë se Partia Socialiste

Besa Shahini është larguar nga detyra si ministre e Arsimit. Lajmi është bërë i ditur nga kryeministri Rama, ndërsa këtë pozicion do ta marrë tashmë Evis Kushi. Zonja Shahini u emërua në krye të ministrisë së Arsimit në dhjetor të vitit 2018, ndërsa më parë kishte shërbyer dhe si zëvendësministre. Kryeministri Rama vlerësoi punën e bërë prej saj duke u shprehur i keqardhur për largimin. Shahini me një karrierë politike tek Vetëvendosja në Kosovë mbeti një eksperiment jo i sukseshëm politik në Tiranë. Dhe kjo jo për faj të shqiptarëve, por për shkak të majtizmit të ish ministres, e cila edhe dje në “Open” të Eni Vasilit pranoi se është më e majtë se Kryeministri. Në fakt largimi i djeshëm vjen pasi vetë Shahini kishte paralajmëruar se do të largohej nga Shqipëria në fund të prillit, një gjë  padëgjuar në politikë dh aq më pak në poste të larta qeveritare. Kjo i ka krijuar jo pak kosto qeverisë dhe kryeministrit, i cili dje ka vendosur që të ndryshojë ministren e arsimit.

Ndërsa zonja Kushi, vjen pas një karriere të gjatë si pedagoge dhe dekane e Fakultetit të Ekonomisë në universitetin Aleksandër Xhuvani në Elbasan në periudhën 2012-2013, periudhë pas së cilës u angazhua në politikë, si deputete e Parisë socialiste.

Pasi e falënderoi për kontributin e dhënë në krye të këtij institucioni kaq të rëndësishëm, Rama u shpreh se puna e ministrisë së Arsimit ka pësuar një ndryshim radikal.

“Besa të falënderoj për gjithë kontributin e madh që ke dhënë, jam i bindur që edhe çfarë nuk është arritur do të vlerësohet për shkak të kohës aktuale. E vërteta është që puna e ministrisë së Arsimit ka pësuar një ndryshim radikal. Lindita ka hapur një kantier reformash në të gjithë spektrin. Besa ka një familje të krijuar rishtas që e ka detyruar të kthehet në Prishtinë”, u shpreh kryeministri Rama.

“E kam të vështirë të vazhdojë një mandat tjetër larg familjes. Ky post është vështirë të mbahet nga unë. PS duhet ta fitojë edhe një mandat tjetër nëse duam ta shikojmë Shqipërinë të ecë më përpara. Kryeministri tregoi kurajë që përfshiu në politikë aktivistë nga Kosova. Ka qenë e paimagjinueshme që ngrihet opozita e akuzon që ministrja flet me dialekt. Një argument gati-gati racist”, u shpreh Besa Shahini pasi i la detyrën pasardhëses së saj.

Është një privilegj i lartë për mua, pas 7 vitesh angazhim të jem ministre. Kjo është një përgjegjësi e madhe për të drejtuar sektorin ku kam punuar për 23 vite. Është një përgjegjësi e lartë të drejtoj këtë institucion të lartë. Elbasani është djepi i arsimit në Shqipëri. Gjej një rrugë të shtruar me shumë reforma, por që duhet të punojmë më shumë. Sot nisëm vitin e ri shkollor, ku u inauguruan dhe disa shkolla të reja”, tha ministrja e re e Arsimit, Evis Kushi.

Besa Shahini

Përmes një postimi në rrjetet sociale, Shahini shkruan se është krenare për punën që ka bërë dhe reformat në arsim. Gjithashtu Shahini nuk ka mbetur pa bërë edhe një koment për opozitën, për të cilën tha se është zhgënjyer nga diskriminimi për shkak të dialektit kosovar. Ndërsa ka shprehur se ka qenë e paimagjinueshme për të që opozita do të ngrihej nga dita e parë të sulmojë prejardhjen dhe dialektin e tyre.

“Kritikët më kanë cilësuar si ministre teknike, por të gjithë e dinë shumë mirë se angazhimi im ka qenë politik. Kam treguar përgjegjshmëri të lartë politike kur kam njoftuar kryeministrin në korrik se unë nuk mund të vazhdoj edhe për një mandat tjetër larg familjes, rrjedhimisht nuk duhet të mbaj një post kaq të lartë politik para betejës së madhe së PS për mandatin tjetër, të cilin duhet patjetër ta marrë nëse e duam Shqipërinë të eci përpara. Gjithashtu, bashkimi kombëtar nuk është çështje teknike, ndaj angazhimi për të, siç jam angazhuar unë, është angazhim politik. Kurajo që ka treguar kryeministri dhe Partia Socialiste, për të përfshirë aktivistë politikë nga Kosova në qeverisjen në Shqipëri, tregon përkushtimin për një bashkëpunim të thelluar kombëtar shqiptar.”-tha Shahini.

Ajo madje shprehu zhgënjimin me të gjithë ata që kanë punuar kundër këtij projekti të madh siç tha ajo. “ Ka qenë e paimagjinueshme për mua që opozita do të ngrihej nga dita e parë të sulmojë prejardhjen dhe dialektin tonë. Të thuhet se shqiptarët që flasin dialektin kosovar (apo verior) janë më pak inteligjent apo me pak të mençur, është epitomi i racizmit. Natyrisht, s’mund të quhet racizëm se jemi i njëjti komb, por që janë përdorur taktika të njëjta, kjo nuk mund të mohohet. Beteja politike ditore mes partive nuk guxon të dëmtojë marrëdhëniet mes shqiptarëve. Për këtë arsye, unë nuk do të ndaloj kurrë së punuari drejt afrimit të kombit tonë. Është dhurata më e mirë që mund t’ia lëmë gjeneratave që vijnë.”

Shahini premtoi se do të angazhohet gjithashtu edhe për të majtën. Por duke shigjetuar Partinë Socialiste ajo tha se “një të majtë të re dhe demokratike, përkundër të majtës së vjetër dhe populiste. Një të majtë që ngërthen më thellë diskursin feminist se sa vetëm në përfaqësim të grave në qeverisje, që Partia Socialiste e ka bërë shumë mirë, por që nuk mjafton për ta luftuar patriarkalizmin”.

Lleshaj: E sigurt që nuk do të jem më në këtë post

Ministri i Brendshëm, Sandër Lleshaj, pas largimit nga kryeministri Rama, si drejtues politik i Lezhës, kësaj radhe paralajmëron vetë largimin edhe si ministër i Brendshëm.

Këtë deklaratë, një nga ministrat më të rëndësishëm të qeverisë Rama, e bëri nga qyteti i Vlorës, gjatë prezantimit të strukturës së re “Shqiponja”.

“Nuk do jem i përhershëm në qeveri, është e sigurt se nuk do të jem më ministër. Asnjë nuk është i përhershëm në një post”, tha Lleshaj gjatë prezantimit të strukturës së re të policisë në Vlorë.

Lleshaj bëhet ministri i dytë, pas ministres së Arsimit, Besa Shahini, që deklaron se nuk do të jetë më pjesë e qeverisë Rama, por pa specifikuar nëse do ta çojë deri në fund mandatin me qeverinë apo do të largohet më shpejt.

Spiropali: Emërimi i Shahinit ishte për të çuar më tej marrëdhëniet Kosovë-Shqipëri

Ministrja e shtetit për Marrëdhëniet për Paralamentin, Elisa Spiropali e ftuar në Report tv ka komentuar në lidhje me largimin e ministres së Arsimit Besa Shahini. Ajo tha se është një arritje e Ramës që bëri pjesë të qeverisë ministra nga Kosova si qëllim për të afruar të dy vendet.

“E konsideroj një nga arritjet e kryeministri Rama për ta afruar Shqipërinë dhe Kosovën për të afruar dy vendet. Kemi qenë të dyja në të njëjtën shkollë të mesme në Kanada. Ky u bë për të çuar më tej marrëdhëniet me Kosovës dhe Shqipërisë'”, tha Spiropali. /Gazeta Liberale

Tags: besa shahini, largimi, lleshaj, ps, spiropali