Një burrë i moshuar ka humbur jetën në Greqi, si pasojë e zjarreve të fuqishme që kanë përfshirë zonën e Kerateas, në juglindje të Athinës. Zjarri u përhap me shpejtësi për shkak të erërave të forta që kanë arritur deri në 88 kilometra në orë.

Sipas autoriteteve greke, më shumë se 200 zjarrfikës, 11 avionë dhe 7 helikopterë janë angazhuar për të shuar flakët. Banorët në disa lagje janë evakuuar për siguri, ndërsa puna e zjarrfikësve është bërë më e vështirë për shkak të motit të keq.

"Trupi i një burri të moshuar u gjet brenda një shtëpie të djegur në Keratea", tha zëdhënësi i shërbimit të zjarrfikësve, Vassilis Vathrakogiannis.

Një gazetar që ndodhej në qytetin e afërt Palaia Fokaia raportoi për shtëpi të përfshira nga flakët dhe re të mëdha tymi.

Ndërkohë, një tjetër zjarr në ishullin Kefalonia është vënë nën kontroll, dhe situata është përmirësuar në gadishullin e Peloponezit.

Ministria e Mbrojtjes Civile njoftoi se disa zona, përfshirë edhe rajonin e Athinës, janë në nivelin më të lartë të rrezikut për zjarre edhe për ditën e shtunë. Shërbimi Meteorologjik grek ka bërë të ditur se erërat pritet të dobësohen pas mesnatës.