Një infermiere nga Lushnja humbi jetën në moshë të re, duke shkaktuar dhimbje te të afërmit, miqtë, kolegët dhe më gjerë. Bëhet fjalë për infermieren Xhuliana Seferi, e cila mbylli sytë përgjithmonë tre ditë më parë në moshën 29-vjeçare.
Lajmin e trishtë e ka bërë me dije sot Urdhri i Infermierit të Shqipërisë përmes një postimi në rrjetet sociale. Urdhri i Infermierit të Shqipërisë. Seferi ka mbaruar studimet për Infermieri dhe punonte në spitalin publik të Lushnjës. Mësohet se ajo vuante kohët e fundit nga një sëmundje e rëndë. E qeshur dhe e përkushtuar në punë, Xhuliana Seferi pavarësisht sëmundjes, deri në momentet e fundit, qëndroi e përkushtuar për profesionin që e donte aq shumë.
Postimi i plotë Urdhri i Infermierit të Shqipërisë:
Të nderuar kolegë,
Me hidhërim të thellë njoftojmë se është ndarë nga jeta në moshë shumë te re kolegia jonë Xhuliana Seferi.
Znj. Seferi lindi në 30 Tetor 1993 në qytetin e Lushnjes.
Studimet e larta i kreu pranë Universitetit Ismail Qemali, në degën Infermieri-Mami.
Ka ushtruar profesionin e infermieres pranë Poliklinikës së Specialiteteve në Lushnje.
Kolegët, miqtë dhe familjarët do të ruajnë kujtimet më të mira për Xhulianën e cila do të kujtohet për virtytet e larta njerëzore dhe intelektuale.
Urdhri i Infermierit të Shqipërisë i shpreh ngushëllimet e sinqerta familjarëve, miqve, kolegëve dhe gjithë të dashurve të saj për këtë humbje të pazëvendësueshme.
Qoftë i paharruar kujtimi i saj!
