Merkel: Zemra ime rreh për Ballkanin Perëndimor

Takim i lumtur lamtumire rajonale i Angela Merkelit, si kancelare e Gjermanisë dhe e mikpritësve të saj në turin ballkanik në Beograd dhe në Tiranë.

Kancelarja Merkel mori vlerësime të larta dhe mirënjohje të sinqertë për gjithë kontributin e saj 16-vjeçar në mbështetje të perspektivës evropiane dhe zhvillimit social-ekonomik të Ballkanit Perëndimor.

Mikpritësit e saj morën konfirmimin për mbështetjen ndaj rajonit nga kushdo që do ta pasojë atë në detyrën e lartë dhe për vijimin e “Procesit të Berlinit”, të inicuar prej saj shtatë vite më parë.

“Çdo kancelar tjetër federal do të jetë mik i rajonit” tha Merkel në Tiranë.

Merkel tha se „Procesi i Berlinit” nuk është „ zëvendësim për anëtarësimin në BE pasi negociatat e anëtarësimit të secilit vend do të vazhdojnë”.

„Me procesin e negociatave për hyrjen në BE mund të vijohet paralelisht edhe bashkëpunimi rajonal që ka më shumë kuptim sesa implementimi i projekteve kombëtare,” tha kancelarja Merkel në konferencën e përbashkët për shtyp me kryeministrin Rama.

Zemra ime rreh për Ballkanin Perëndimor

Kancelarja Merkel deklaroi përsëri si në Samitin e Berlinit, më 5 korrik të këtij viti, interesin gjeostrategjik të BE-së për përfshirjen e Ballkanit Perëndimor nga njëra anë dhe nga ana tjetër vlerësoi bashkëpunimin rajonal mes gjashtë vendeve të Ballkanit Perëndimor, si rrugën që përshpejton kohën e hyrjes së tyre në BE.

“Zemrime rreh për këtë rajon. Kam bindjen që BE dhe Gjermania, vendi që unë përfaqësoj, në këndvështrimin gjeostrategjik, kanë një interes të vetin për anëtarësimin e Ballkanit Perëndimor në BE. Por bashkëpunimi rajonal është një ide e pranuar nga BE dhe këndvështrimi gjerman. Nëse ju takoheni kjo është e drejta juaj dhe unë e përshëndes vërtet dhe shpresoj të vazhdoni në këtë drejtim,” tha kancelarja Merkel.

Merkel për DW: BE duhet t’i mbajë premtimet

Pyetjes së DW lidhur me hapat që duhet të ndërmarrë BE për të reflektuar konkretisht interesin e tij gjeostrategjik ndaj Ballkanit Perëndimor duke plotësuar premtimet dhe hapur rrugë progresit të vendeve të rajonit në etapat e procesit drejt pranimit, kancelarja Merkel iu përgjigj:

“Kur kriteret dhe kushtet e vendosura, si në rastin e Shqipërisë, të plotësohen, duhet që Bashkimi Evropian të mbajë fjalën e vet dhe jo të nxjerrë kushte të tjera, sepse për shkaqe të politikës së brendshme në vende të caktuara, kjo (mbajtja e premtimit) nuk ka qenë e mundur. Në momentin që konstatohet që kushtet janë përmbushur, atëherë duhet të mbahet fjala, sepse përndryshe kemi zhgënjim. Ne duhet të dimë t’i besojmë njëri-tjetrit,” tha kancelarja Merkel për DW.

Albanien Bundeskanzlerin Merkel bei ihrem Abschiedsbesuch in Tirana
Ajo ngjalli shpresa për një ”Po” lidhur me hapjen e negociatave kur tha se “është shpresëplotë për Shqipërinë dhe Maqedoninë e Veriut që kanë pasur mbështetjen e të gjitha vendeve të BE-së për të hapur negociatat. Tani bëhet fjalë tani për Konferencën Ndërqeveritare dhe me siguri ka mirëkuptim për gjitha shenjat e padurimit që tregohen prej këtyre vendeve në këtë drejtim” theksoi ajo.

Procesi i Berlinit i pazëvendësueshëm, bërthama e gjithçkaje

Kryeministri Rama e vlerësoi “Pocesin e Berlinit” të inicuar në gushtin e vitit 2014 nga kancelarja Merkel ” një vizion largpamës për ta parë të ardhmen të gjithë së bashku.”

“Arritja më e madhe e këtij procesi është vendosja e një fryme bashkëpunimi, bashkëveprimi dhe sensi të së ardhmes së përbashkët. Ballkani Perëndimor është një vend shumë më i mirë, seç ishte përpara sesa Angela Merkel të niste Procesin e Berlinit. Angela Merkel ka vendosur një gur kilometrazhi për breza të tërë. Jemi duke kapërcyer dhjetëra e pse jo qindra vjet histori dhe njëkohësisht jemi duke luftuar me një prapambetje që është shumë e thellë dhe që vjen nga shumë larg, Procesi i Berlinit është një vizion afatgjatë që do kalojë nga një qeveri në një tjetër, nga një gjeneratë në tjetrën, për të realizuar këtu në rajonin tonë, atë që Kancelarja ka paraparë në vitin 2014 kur inicoi këtë proces,” tha Rama në konferencën e përbashkët për shtyp.

Ai vlerësoi lart personalitetin e kancelares Merkel kur tha se „ajo është një dhe nuk vjen më për arësye të historisë së saj, eksperiencës së jashtëzakonshme në katër mandate rresht në krye të lokomotivës së Bashkimit Evropian.”

Vetë Kancelarja Merkel e krahasoi “Procesin e Berlinit” me një “bimë mjaft të fuqishme” që u rrit që nga inicimi i idesë së saj 7 vjet më parë.

“Procesi i Berlinit është bërthama e gjithçkaje dhe në këtë kontekst, Procesi i Berlinit nuk mund të zëvendësohet, gjërat thjesht mund të përshpejtohen brenda këtij Procesi. Kanë ndryshuar shumë gjëra në bashkëkzistencën e popujve dhe vendeve të rajonit në marrëdhëniet me njëri-tjetrin. Përshëndes projektin e Tregut të Përbashkët Rajonal me katër marrëveshjet e tij. Sot kemi rënë dakord që sa më shumë të bashkëpunojnë në këtë kontekst, aq më i mirë e aq më i fuqishëm do të jetë Procesi i Berlinit.” tha Merkel.

Procesi i Berlinit dhe “Open Balkans”

Si një nga nismëtarët e “Open Balkans” kryeministri i Shqipërisë Edi Rama e quajti atë “pjellë te Procesit të Berlinit”, jo alternativë të këtij procesi dhe as në kontradiktë me të.”

“Open Balkans është as më shumë e as më pak, por një mekanizëm për ta përshpejtuar Procesin e Berlinit, Nuk ka Open Balkan që kontradikton me Procesin e Berlinit, përkundrazi është marrja në dorë e Procesit.. Open Balkans është asgjë më shumë, sesa mjeti i rajonit për të implementuar Procesin e Berlinit,” tha Rama.

Pyetjes së DW lidhur me objektivat e qeverisë së tij për të cuar përpara arritjet e Procesit të Berlinit. duke u fokusuar në bashkëpunimin rajonal dhe forcimin e ekonomisë së Shqipërisë Rama iu përgjigj: “Procesi i Berlinit është një proces që do të vazhdojë. Open Balkan është një mekanizëm për ta përshpejtuar, kaq. Nuk ka absolutisht asnjë kontradiktë mes të dyjave. “Open Balkans është krijuar jo për të përjashtuar njeri por për të mos u varur nga vetot e njërit dhe nga teoritë e konspiracionit të tjetrit, por për të ecur përpara, gjithmonë duke pasur parasysh gjithë “road map” të Procesit të Berlinit. Ne duam të ecim më shpejt. Nuk kemi pse presim që të hyjmë në Bashkimin Evropian që të ndërtojmë autostradat apo të ndërtojmë infrastrukturën digjitale apo të ndërtojmë tregjet e përbashkëta.” tha Rama.

Rama i quajti teori konspiracioni kundërshtimin e Kosovës për të marrë pjesë në “Open Balkans”.

Burime zyrtare citojnë kryeministrin e Kosovës, Albin Kurtin, se ka dekaruar të martën që “kancelarja nuk i kërkoi që Kosova të përfshihet në “Open Balkans” në takimin kokë më kokë me të. ”Ne nuk e konsiderojmë në interes të Kosovës përfshirjen në këtë nismë.” tha Kurti para mediave pas takimit në Tiranë me kancelaren Merkel./DW

Tags: Angela Merkel, ballkani perendimor