Aktori i njohur dhe shumë i dashur për publikun, Salsano Rrapi, ka qenë së fundmi i ftuar në emisionin “Hap Ç’ju” me Visjan Ukcenaj dhe Cubi Metkaj, ku ndau me publikun më shumë rreth rrugëtimit të tij në skenë dhe televizion. Në një bisedë plot humor, sinqeritet dhe reflektim, Salsano rrëfeu linjën e jetës dhe tregoi se si ka arritur të ndërtojë një karrierë të qëndrueshme si në moderim, ashtu edhe në aktrim.

Gjatë intervistës, një nga momentet më të veçanta ishte kur u diskutua mundësia e pjesëmarrjes së tij në “Big Brother VIP”. I pyetur nga Visjani për këtë çështje, Salsano nuk e përjashtoi plotësisht, por dha një përgjigje që tregon qasjen e tij njerëzore dhe të sinqertë ndaj këtij formati:

“Unë kur e shoh BBV është shumë tunduese, sidomos kur aty ka debate mendoj që po të isha unë aty do thoja këtë, pra do të reagosh.”
Megjithatë, ai vuri në dukje se lidhja me njerëzit e tij të afërt është shumë e fortë, çka e bën të vështirë shkëputjen për një periudhë të gjatë:

“Në përgjithësi unë nuk rri dot larg njerëzve të mi të dashur dhe miqve të mi. Unë kam një ritual shumë të mirë dhe ma mbushin jetën me gëzim, përpos edhe halleve që kemi.”
Ai shtoi gjithashtu një vëzhgim interesant mbi perceptimin publik dhe realitetin brenda formatit:

“Plus që kur hyn aty brenda çfarë nuk thuhet jashtë. Fillojnë fantazitë, kur ti nuk je pastaj ato vazhdojnë edhe katër muaj, ndërsa kur je është ndryshe.”