Sekretari i Përgjithshëm i NATO-s, Jens Stoltenberg, tha se Ukraina kurrë nuk ka qenë më afër anëtarësimit në NATO dhe se presidenti rus, Vladimir Putin deshi që t’ia mbyllte këtë derë. Këto deklarata zyrtari i lartë i NATO-s i bëri në dyvjetorin e fillimit të pushtimit rus të Ukrainës.
“Sot shënuam dy vjet që kur tanket ruse u futën në Ukrainë. Fillimi i luftës më të madhe në Evropë që nga Lufta e Dytë Botërore. Më lejoni të filloj duke nderuar të gjithë ata ukrainas trima që kanë rënë ose janë plagosur në mbrojtjen e atdheut të tyre. Situata në fushën e betejës mbetet jashtëzakonisht e rëndë”, tha Stoltenberg.
Teksa foli për gjendjen në Ukrainë, Stoltenberg u shpreh se synimi i Putinit nuk ka ndryshuar dhe se Ukraina ka dëshmuar aftësi të jashtëzakonshme për vendosmëri.
“Synimi i Presidentit Putin për të dominuar Ukrainën nuk ka ndryshuar. Dhe nuk ka asnjë tregues se ai po përgatitet për paqe. Por ne nuk duhet të humbasim shpresën. Ukraina ka demonstruar aftësi të jashtëzakonshme dhe vendosmëri vazhdimisht. Ukraina, nuk u shemb brenda javësh siç kishin frikë se do të ndodhte. Ju keni rimarrë gjysmën e territorit të pushtuar nga Rusia”, shtoi ai.
“Ju e keni larguar Rusinë nga pjesë të mëdha të Detit të Zi dhe u keni shkaktuar humbje të mëdha forcave ruse. Mbi të gjitha, Ukraina ruan lirinë dhe pavarësinë e saj. Kjo është bërë e mundur nga guximi dhe vendosmëria juaj. Mundësuar nga mbështetja e madhe ushtarake dhe ekonomike nga aleatët e NATO-s.
Vetëm ditët dhe javët e fundit, aleatët e NATO-s kanë njoftuar paketa të reja ndihme me vlerë miliarda dollarë. Këto mbulojnë aftësi kyçe si municione artilerie, mbrojtje ajrore dhe anije luftarake. Si dhe pajisjet dhe pjesët rezervë F-16, dronët dhe pajisjet e çminimit. Më shumë mbështetje është në rrugë e sipër”, tha Stoltenberg.
