Zëvendësministri i Punëve të Jashtme të Iranit, Majid Takht-Ravanchi, i ka kërkuar Shteteve të Bashkuara të përjashtojnë çdo mundësi për sulme të reja ndaj vendit të tij, nëse Uashingtoni synon me të vërtetë rinisjen e bisedimeve diplomatike mbi programin bërthamor iranian.

Në një intervistë për BBC-në, zyrtari i lartë iranian deklaroi se Teherani kërkon një garanci reale për ndalimin e veprimeve ushtarake si kusht paraprak për t’u rikthyer në tryezën e negociatave. Ai theksoi se ndërsa administrata e Donald Trump ka shprehur përmes ndërmjetësve dëshirën për rifillimin e dialogut, nuk ka dhënë ende një qëndrim të qartë për vijimësinë e sulmeve gjatë procesit të bisedimeve.

Shtetet e Bashkuara dhe Irani ishin përfshirë në raunde bisedimesh të ndërlikuara për programin bërthamor iranian, kur situata u përshkallëzua më tej me një operacion ushtarak të Izraelit më 13 qershor, që goditi centralet bërthamore dhe objekte ushtarake iraniane. Si kundërpërgjigje, Irani lëshoi raketa, ndërsa më 21 qershor SHBA ndërhyri drejtpërdrejt, duke bombarduar tre centrale bërthamore në territorin iranian.

Këto zhvillime të dhunshme bënë që raundi i gjashtë i bisedimeve jo direkte, i planifikuar të mbahej më 15 qershor në Muscat, të dështonte plotësisht.

Zëvendësministri iranian këmbënguli se vendi i tij do të vijojë pasurimin e uraniumit për qëllime paqësore, në përputhje me të drejtën ndërkombëtare, duke mohuar sërish akuzat se Republika Islamike po përpiqet të ndërtojë një armë bërthamore.

“Niveli i kësaj përfshirjeje mund të diskutohet, kapaciteti mund të diskutohet. Por që të thuhet se ju nuk duhet të keni fare pasurim, duhet ta keni pasurimin zero se në të kundërt, ne ju bombardojmë – ky është ligj xhungle,” deklaroi Ravanchi, duke akuzuar Uashingtonin dhe aleatët për qasje të njëanshme dhe agresive.

Tensionet mbeten të larta, ndërsa shpresat për një zgjidhje diplomatike varen nga përgatitja e të dyja palëve për kompromis dhe de-përshkallëzim.