Prokuroria e Posaçme ka publikuar raportin vjetor të punës për vitin 2024, duke evidentuar goditjet ndaj krimit të organizuar dhe korrupsionit në nivele të larta.

Sipas SPAK, gjatë vitit të kaluar janë hetuar 844 persona, nga të cilët 412 janë arrestuar me masë sigurie “arrest me burg”, ndërsa 34% e çështjeve janë dërguar për gjykim.

Një vëmendje e veçantë i është kushtuar hetimeve për krimet zgjedhore (43 procedime) dhe veprat terroriste (29 procedime).

Po ashtu, raporti tregon se janë ekzekutuar mbi 2000 vendime gjykate dhe janë identifikuar 16 grupe kriminale të rrezikshme, 9 prej të cilave falë dekriptimit të aplikacionit Sky ECC.

Në raport nënvizohet se gjatë vitit 2024 janë përdorur përgjime në 163 procedime penale, me një total prej 3096 numrash telefoni të përgjuar, një shifër më e ulët krahasuar me vitin 2023.

SPAK gjithashtu ngre shqetësimin për presionet e jashtme nga krimi i organizuar, aktorë politikë dhe mediatikë, të cilat cenojnë pavarësinë e institucionit dhe efektivitetin e hetimeve.

Në këtë kontekst, raporti thekson nevojën për një reagim të koordinuar mes institucioneve për të garantuar mbrojtjen e prokurorëve dhe integritetin e procesit hetimor./Liberale.al