Luvsannamsrain Oyun-Erdene humbi votbesimin parlamentar në një vend me pasuri të madhe minerale - sipas FT
Kryeministri i Mongolisë dha dorëheqjen pasi humbi votëbesimin, mes zemërimit tw publikut për shpenzimet e tepërta të të birit, duke nxitur pasiguri politike në vendin e Azisë Qendrore me pasuri të mëdha minerale.
Luvsannamsrain Oyun-Erdene, reformisti i arsimuar në Harvard, i cili ka udhëhequr Mongolinë që nga viti 2021, fitoi vetëm 44 nga 64 votat që i nevojiteshin nga ligjvënësit në një votim të mbajtur në orët e para të së martës. Oyun-Erdene kwrkoi votwbesim javën e kaluar mes përçarjeve në partinë e tij dhe ndërsa shpërthyen protesta për stilin luksoz të jetesës së të birit.
Partia e tij Popullore Mongole, e cila ka krijuar një qeveri koalicioni me dy parti të tjera që nga zgjedhjet e një viti më parë, pritet të përpiqet të formojë një qeveri në ditët në vijim. Trazirat politike krijojnë shumë rrezik për Mongolinë , e cila doli nga një sistem politik një-partiak nën kontrollin socialist në vitet 1990 dhe e zgjeroi parlamentin e saj vetëm vitin e kaluar.
Oyun-Erdene ka kërkuar prej kohësh investime nga grupet perëndimore të minierave për të shfrytëzuar depozitat e mëdha të bakrit, uraniumit dhe mineraleve të tjera kritike në vend, një mbështetje që mund t'i japë Ulaanbaatarit një mbrojtje ndaj Pekinit dhe Moskës.
Turma njerëzish u mblodhën muajin e kaluar në Ulaanbaatar në protestë kundër stilit të jetesës luksoze të djalit të kryeministrit (Byambasuren Byamba-Ochir/AFP/Getty Images)
Ai ka udhëhequr një plan për të përgjysmuar shkallën e varfërisë në vendin me 3.5 milionë banorë në 15 për qind deri në fund të dekadës. Në themel të kësaj përpjekjeje ishin shpresat për investime të huaja direkte afatgjata në nxjerrjen dhe përpunimin e burimeve minerale, duke synuar një PBB prej 50 miliardë dollarësh deri në vitin 2030 , nga 15 miliardë dollarë në vitin 2022.
Megjithatë, thirrjet për dorëheqjen e Oyun-Erdene u shtuan në javët e fundit, ndërsa qindra të rinj mongolë dolën në sheshin Sükhbaatar të kryeqytetit, pasi një postim në rrjetet sociale tregoi se djali i tij po shpenzonte shumë para për partneren. Postimi, i raportuar nga mediat lokale, duket se është hequr më pas nga rrjetet sociale.
Dhuratat përfshinin një çantë të zezë Dior, pajisje shtëpiake Smeg dhe një xhaketë Miu Miu, sipas fotove të shfaqura në ikon.mn, një faqe lajmesh lokale. Protestat duket se kanë shkaktuar edhe përçarje midis kampeve rivale në koalicionin e brishtë të qeverisë, përfshirë atë midis kryeministrit dhe presidentit Khurelsukh Ukhnaa.
Duke folur përpara votimit në parlamentin e Mongolisë, Oyun-Erdene u përpoq të mbronte reputacionin e tij përballë “sulmeve politike” në rritje dhe “bashkimit të interesave të mëdha, të dukshme dhe të fshehura”.
Ai vuri në dukje arritjet e fundit ekonomike, përfshirë rritjen e të ardhurave nga eksporti dhe PBB-së, si dhe një sërë mega-projektesh, siç ishte marrëveshja e investimit prej 1.6 miliardë dollarësh me Grupin Orano të Francës për të zhvilluar një minierë uraniumi.
Megjithatë, Oyun-Erdene vuri në dukje se ai i kushtoi “vëmendje të pamjaftueshme çështjeve sociale dhe politike të brendshme”. Në fund të vitit 2022 shpërthyen protesta për korrupsionin në sektorin e qymyrit.
Planet e Oyun-Erdene për rritje ekonomike, së bashku me progresin e qeverisë së tij në shlyerjen e borxheve dhe reformat në sektorin e energjisë kishin rritur shpresat e investitorëve për një periudhë stabiliteti të qëndrueshëm ekonomike dhe qeverisëse në Mongoli.
Agjencia e kreditit Fitch në shtator përmirësoi vlerësimet afatgjata të vendit për valutën e huaj në B plus me një perspektivë të qëndrueshme. Në atë kohë, Fitch vuri në dukje se vendi aziatik parashikonte një rritje reale të PBB-së prej rreth 6% në dy vite deri në vitin 2026 për shkak të zgjerimit në sektorin e minierave dhe aktivitetit "të fortë" në pjesë të tjera të ekonomisë.
Bayanjargal Byambasaikhan, nënkryetar dhe kryetar i Këshillit të Biznesit të Mongolisë dhe investitor në energjinë e pastër, tha se ndërsa shumë projekte kapitale ishin “në proces të mirë”, qeveria e ardhshme kishte një sërë sfidash për shkak të frikës nga inflacioni i lartë dhe rënies së të ardhurave nga eksporti. “Politikat e koalicionit nuk janë kurrë të lehta”, tha ai. “Mongolia është një demokraci në aspiratë, prandaj ndryshimi politik është diçka që investitorët duhet të presin kur marrin vendime.” Zyra e kryeministrit mongol nuk ka bërë ende komente lidhur me zhvillimet e fundit.
