Zërat për ekzistencën e dokumenteve apo ditarëve personalë komprometues nga ana e Meghan Markle ndaj Familjes Mbretërore janë rikthyer në qarkullim. Sipas spekulimeve, Dukesha e Sussex-it mund të posedojë prova që mbështesin akuzat e saj dhe të Princit Harry, për çështje si racizmi dhe mungesa e mbështetjes emocionale brenda oborrit mbretëror.
Por, sipas analistit mbretëror Jack Royston, këto të dhëna të mundshme nuk do të kishin më ndikimin e dikurshëm. “Intervista me Oprah u menaxhua keq, dhe sulmet e përsëritura ndaj familjes mbretërore i kanë dëmtuar më shumë çiftin sesa institucionin që synuan të kritikojnë”, shprehet Royston.
Sipas tij, edhe nëse Meghan dhe Harry zotërojnë “bomba të pashpërthyera”, rezonanca e tyre në publik sot është shumë më e vogël. Në vend që të shkaktojnë tronditje, ato mund të përforcojnë perceptimin e lodhjes publike nga konflikti i zgjatur mes çiftit dhe pallatit mbretëror – një temë që, sipas sondazheve të fundit, nuk ka më të njëjtin interes si më parë, as në Britani, e as në SHBA.
