Përshtati dhe përgatiti për Liberale.al, Laert MIRAKU
Kontributi i 5G në PBB në Kinë pritet të arrijë pothuajse 260 miliardë dollarë në vitin 2030, që është 23 për qind e ndikimit të përgjithshëm vjetor ekonomik të celularëve në Kinë. Gjithashtu, deri në vitin 2030, lidhjet 5G në Kinë do të përbëjnë gati një të tretën e totalit global, me adoptimin e 5G në Kinë që arrin pothuajse 90 për qind, duke e bërë atë një nga tregjet kryesore globale.
Drejtori i Përgjithshëm i GSMA, Mats Granryd, tha: “Është e mrekullueshme të shohësh Kinën, tregu më i madh në botë i rrjetit 5G, të angazhohet me kaq entuziazëm ndaj nismës së Open Gateway të GSMA për të ndihmuar në nxitjen e rritjes dhe pjekurisë së teknologjisë.
Ndërsa Kina tejkalon një miliard lidhje 5G këtë vit, ne presim të shohim investime dhe potencial të mëtejshëm në evolucione të tilla si 5G-Advanced, 5G New Calling dhe 5G RedCap për të përmirësuar përvojën e përdoruesit dhe për të zhbllokuar rrjedha të reja të të ardhurave për operatorët.
Tregu 5G në Kinë vazhdon të rritet, duke çuar në rritjen e lidhjeve dhe vlerën më të gjerë ekonomike. Adoptimi i 5G po rritet më shpejt se sa pritej falë shpejtësisë së vendosjes së rrjetit dhe ekosistemit të pajisjes në rritje. Më shumë se 800 milionë lidhje celulare kineze janë tashmë 5G. Këtë vit proporcioni i lidhjeve 5G parashikohet të rritet nga 45 për qind në mbi 50 për qind dhe të bëhet teknologjia celulare dominuese në vend, me më shumë se një miliard lidhje totale deri në fund të 2024.
Me 1.28 miliardë abonentë celularë unikë në Kinë, një normë penetrimi prej 88 për qind dhe kontributi i përgjithshëm i celularit në ekonominë kineze në 2023 arriti në 970 miliardë dollarë, ose 5.5 për qind të PBB-së, ekosistemi i përgjithshëm tani mbështet pothuajse 8 milionë vende pune në vend dhe kontribuon me 110 miliardë dollarë në vit nëpërmjet taksave, ndërsa të ardhurat e operatorit arritën në 225 miliardë dollarë për vitin 2023. Deri në fund të dekadës, kontributi vjetor ekonomik nga sektori celular i Kinës parashikohet të kalojë 1 trilion dollarë.
