Plazhi i Darzezës, vetëm 20 kilometra larg qytetit të Fierit, po tërheq çdo vit gjithnjë e më shumë pushues, si vendas ashtu edhe turistë të huaj.
Kryeministri Edi Rama publikoi sot pamje nga ky plazh, ku shihet një numër i madh pushuesish nga të gjitha grupmoshat që shijojnë bukuritë natyrore të zonës.
Me një shtrirje prej 13.7 km², Darzeza është e njohur për rërën e saj të imët dhe ujërat e kristalta. Ky plazh i veçantë nuk dallon vetëm për bukurinë natyrore, por edhe për pastërtinë dhe pyllin shekullor që e rrethon.
Zona ofron kushte ideale për sportet e ujit, si kitesurfing, windsurf, dhe wakeboard, falë dallgëve të forta që krijohen nga era – një fenomen unik për bregdetin e Ballkanit.
Në fundjavë, Darzeza është një nga destinacionet më të preferuara të fierakëve dhe vizitorëve të tjerë, me mbrëmje të freskëta dhe atmosferë relaksuese, që e bëjnë këtë plazh një perlë të vërtetë bregdetare.
