Prezenca e OSBE në Tiranë nuk është konsultuar nga autoritetet shqiptare gjatë hartimit të draftit për Kodin e ri Penal. Në një reagim për mediat, zyra e OSBE në Tiranë thekson se bëhet fjalë për një ligj themelor që meriton kohë të mjaftueshme dhe një proces konsultimi të plotë, teksa shpreh gatishmërinë të ofrojë ekspertizën e saj.
“Prezenca e OSBE-së në Shqipëri thekson rëndësinë e Kodit Penal si një ligj themelor që meriton kohë të mjaftueshme dhe një proces konsultimi të plotë. Megjithëse nuk kemi qenë të përfshirë në hartimin e ndryshimeve të propozuara, ne po shqyrtojmë draftin e disponueshëm dhe jemi të gatshëm t’u ofrojmë rekomandime konkrete qeverisë dhe parlamentit të ri, në përputhje me mandatin tonë për të mbështetur institucionet demokratike dhe shtetin e së drejtës në Shqipëri”.
Më herët edhe prezenca e Bashkimit Europian konfirmoi se nuk ishte konsultuar për draftin, teksa bëri thirrje për një konsultim sa më të gjerë.
Referuar veçanërisht shqetësimeve mbi lirinë e medias, Kryeministri Rama konfirmoi se para kalimit në Parlament, Kodi i ri Penal do të konsultohet edhe me ekspertët e Brukselit.
