Prokuroria e Posaçme AntiKorrupsion ka marrë zyrtarisht të pandehur kryetarin e Bashkisë së Tiranës, Erion Veliaj, bashkëshorten e tij Ajola Xoxa dhe biznesmenin Elman Abule.
Këtë të mërkurë më 23 korrik, pritet që kryebashkiakut t’i komunikohen akuzat për korrupsion, pastrim parash dhe fshehje të pasurisë.
Ndërkaq ndaj Veliajt vijojnë hetimet edhe për një tjetër çështje penale, e lidhur me akuzën “futje e sendeve të paligjshme në qeli”, për të cilën SPAK ka regjistruar një dosje më herët.
Ende nuk dihet nëse çifti Xoxa–Veliaj do të paraqiten edhe vetë, apo do të marrin dijeni përmes avokatëve të tyre.
Veliaj është vënë në hetim nga SPAK disa muaj më parë dhe që prej 10 shkurtit, kur u arrestua, qëndron në paraburgimin e Durrësit.
Ditën e djeshme, më 22 korrik, në një reagim zyrtar ekipi ligjor i kryebashkiakut hodhi akuza në drejtim të SPAK, se po shkel sekretin hetimor dhe po përpiqet të ndikojë publikun në dëm të klientit të tyre.
Kujtojmë se Erion Veliaj ndodhet në qeli prej datës 10 Shkurt dhe ndaj tij rëndojnë akuzat për korrupsion, pastrim parash dhe fshehje pasurie.
