Kreu i Partisë Demokratike, Sali Berisha, në një konferencë për shtyp, ka akuzuar sërish sot kryeministrin Edi Rama për përdorimin e lejeve të ndërtimit, si mjet për blerjen e votave në zgjedhjet e 11 majit 2025.
“Degradimi i zgjedhjeve në farsë elektorale më 11 maj 2025 ishte një nga aktet më të shëmtuara, më kriminale, më antikushtetuese. Edi Rama përdori të gjithë fuqinë ekzekutive për të ndikuar në të gjitha mënyrat në denatyrimin, shkatërrimin, shndërrimin në farsë të procesit zgjedhor”, u shpreh Berisha.
Ai shtoi se gjatë periudhës zgjedhore janë dhënë 450 leje ndërtimi në kundërshtim me ligjin.
“Edi Rama bleu vota me 450 leje për bandat e narkotrafikut, në një periudhë të ndaluar me ligj për dhënien e tyre. Nga prilli 2024 deri në maj 2025 janë dhënë mbi 1 mijë leje ndërtimi. 450 prej tyre gjatë periudhës zgjedhore. Këtu nuk përfshihen mijëra e mijëra leje të dhëna për shtesa, rikonstruksione, etj., në mbarë Shqipërinë, nga bashkitë e vendit”, theksoi Berisha.
Kujtojmë se zgjedhjet e 11 majit i fitoi Partia Socialiste, duke lënë shumë pas partitë e tjera. Ndërsa kreu i PD-së, Sali Berisha, nuk e ka pranuar këtë rezultat, duke ngritur akuza se PS ka vjedhur e manipuluar votat e shqiptarëve.
