Gjykata e Posaçme e Shkallës së Parë për Korrupsionin dhe Krimin e Organizuar ka vendosur kalimin për gjykim të çështjes penale në ngarkim të ish-zv.kryeministrit Arben Ahmetaj, i akuzuar për veprën penale të “shpërdorimit të detyrës”.
Sipas vendimit të shpallur në seancën paraprake të datës 25 korrik 2025, me gjyqtar Erjon Çelën, u pranua kërkesa e Prokurorisë së Posaçme kundër Korrupsionit dhe Krimit të Organizuar (SPAK), e cila më 21 dhjetor 2023 kishte depozituar kërkesën për dërgimin në gjyq të dosjes “Buka”.
Arben Ahmetaj akuzohet në këtë dosje për “shpërdorim detyre”.
Sipas organit të akuzës, kur shërbente si ministër Financash, Ahmetaj lejoi privatizimin e trojeve të një furre buke, ku tashmë është ndërtuar një kompleks pallatesh.
Ahmetaj është duke u hetuar edhe për tre vepra penale të tjera penale, si “pastrim parash”, “fshehje të pasurisë” dhe “korrupsion pasiv”, në lidhje me inceneratorin.
