Njëri nga të arrestuarit më të spikatur në operacionin e fundit të SPAK për shkatërrimin e një rrjeti të trafikut ndërkombëtar të kokainës është Klevis Hoxhosmani, një shtetas shqiptar me origjinë nga Vlora, i cili rezulton të ketë pasur një aktivitet të gjerë biznesor në Britaninë e Madhe.
Sipas të dhënave të siguruara nga Top Channel nëpërmjet regjistrit të bizneseve në Angli, Hoxhosmani ka qenë pronar dhe drejtues i disa kompanive, përfshirë një lavazh të makinave me emrin “Crystal Hand Carwash Of Bournemouth Limited”, aktiv në periudhën 2013–2015, si dhe kompania “Barrack Road Tyres Limited”, ku ai mbajti postin e drejtorit nga marsi 2014 deri në mars 2015. Më pas, drejtimi i kompanisë iu kalua një shtetasi lituanez.
Në maj 2023, ai themeloi një tjetër biznes të quajtur “Opa Coffee Limited”, i cili më vonë ndërroi adresën në mars të vitit 2025. Megjithëse nuk rezulton të ketë pasur precedentë penalë të rëndë në Britani, Hoxhosmani është dënuar në vitin 2014 për sulm fizik dhe dëmtim prone, duke u detyruar nga gjykata britanike të kryente punë komunitare dhe të paguante dëmshpërblim për viktimën, si dhe shpenzime gjyqësore.
Por, përtej këtyre episodeve të mëhershme, emri i tij ka dalë në skenë në kuadër të një hetimi të gjerë të Prokurorisë së Posaçme kundër Krimit të Organizuar dhe Korrupsionit (SPAK). Sipas njoftimit të SPAK, Hoxhosmani është pjesë e një grupi të strukturuar kriminal, me lidhje me atë që njihet si “Banda e Durrësit”, fillimisht nën drejtimin e Lulzim Berishës, e më pas nga Plarent Dervishi, i njohur ndryshe si kunati i tij.
Në prill të vitit 2023, 250 kg kokainë e nisur nga Amerika Latine u kap nga autoritetet, e destinuar për në Britaninë e Madhe përmes Francës dhe kanalit të La Manshit. Dyshohet se kjo sasi e konsiderueshme droge ishte vetëm një pjesë e vogël e rrjetit të gjerë të trafikut që organizata kishte ngritur prej kohësh.
Bisedat e përgjuara në aplikacionet e koduara SKY/ECC kanë çuar autoritetet në përfundimin se Hoxhosmani mund të ketë luajtur një rol të rëndësishëm brenda rrjetit kriminal, ndoshta si një lloj “përfaqësuesi i organizatës në Britani”, megjithëse SPAK deri tani nuk ka dhënë detaje zyrtare mbi pozicionin e tij të saktë në këtë strukturë kriminale.
Hetimet vazhdojnë dhe priten zbardhje të mëtejshme për të kuptuar nivelin e përfshirjes së Hoxhosmanit dhe mënyrën se si bizneset e tij në Angli mund të kenë shërbyer si mbulim apo instrument për pastrim parash dhe logjistikë për trafikun ndërkombëtar të drogës.
