Një tjetër rast i trafikut të drogës me protagonist një shtetas shqiptar është zbuluar në Itali. Policia e Bolonjës ka vënë në pranga një 52-vjeçar shqiptar, pasi në apartamentin ku jetonte u gjetën mbi 14 kilogramë lëndë narkotike të fshehura në frigorifer.

Operacioni u zhvillua mëngjesin e 25 korrikut, pas hetimeve të nisura nga lëvizje të dyshimta në zonën e Via Bigari, ku ndodhej banesa e shqiptarit. Pas ndjekjes disa orëshe, ai u ndalua nga policia teksa po hynte në apartament rreth orës 12:50.

Gjatë kontrollit, forcat e rendit zbuluan 25 pako hashashi me një peshë totale prej 12.13 kg, si dhe 2.3 kg marihuanë të paketuar në vakum. Droga ishte fshehur brenda frigoriferit të banesës. Policia gjeti gjithashtu materiale për paketim, dy makineri për mbyllje vakumi, qese plastike, dy telefona celularë dhe vetë frigoriferin, që u sekuestrua si provë materiale.

52-vjeçari u shoqërua menjëherë në burgun “Rocco d’Amato” dhe pritet të dalë para trupit gjykues për t’u përballur me akuzat e posedimit dhe shpërndarjes së drogës në sasi të mëdha.

Autoritetet italiane e cilësuan arrestimin si një goditje të rëndësishme ndaj rrjeteve të trafikut të drogës në zonën e Bolonjës. Hetimet pritet të zbulojnë nëse 52-vjeçari ishte pjesë e një grupi më të madh kriminal.