Një vatër zjarri është shfaqur këtë të shtunë në Parkun Kombëtar të Prespës, në territorin e Bashkisë Pustec, duke vënë në lëvizje të gjitha strukturat e emergjencës.
Më shumë se 50 forca zjarrfikëse ndodhen aktualisht në terren, së bashku me punonjës të shërbimeve publike, të Administratës së Zonave të Mbrojtura (ADZM), policisë kufitare dhe prefektin e qarkut të Korçës, Nertil Jole.
Zjarri është konstatuar në fazat e para dhe ndërhyrja e shpejtë e forcave në terren ka bërë të mundur izolimin e flakëve, duke parandaluar përhapjen e tyre në zona të tjera të parkut.
Autoritetet thonë se janë marrë masat e para për të menaxhuar situatën, ndërsa po bëhet vlerësimi i terrenit dhe përmasave të zjarrit për ndërhyrje të mëtejshme. Deri tani nuk raportohet për rrezik për banesa apo për jetën e njerëzve.
Strukturat mbeten në gadishmëri dhe pritet që operacioni i shuarjes të vijojë deri në izolimin e plotë të vatrës së zjarrit.
