Një vatër zjarri është shënuar sot në zonën e Grykshit, pjesë e bashkisë Peqin. Flakët janë përhapur me shpejtësi në një sipërfaqe me bimësi të dendur, duke rrezikuar përhapjen edhe në zona të tjera përreth.
Fatmirësisht, ndërhyrja e shpejtë e forcave zjarrfikëse ka bërë të mundur vendosjen e situatës nën kontroll. Deri më tani nuk raportohet për dëme në banesa apo për persona të lënduar.
Shkaqet e zjarrit mbeten ende të paqarta. Autoritetet kanë nisur hetimet për të zbuluar nëse bëhet fjalë për zjarrvënie të qëllimshme apo nëse zjarri është shkaktuar nga temperaturat e larta të ditëve të fundit.
Bashkia Peqin dhe shërbimet emergjente bëjnë thirrje për kujdes dhe bashkëpunim nga banorët e zonës, duke njoftuar menjëherë në rast se vërehen vatra të tjera zjarri.
