Prokuroria e Posaçme Kundër Korrupsionit dhe Krimit të Organizuar (SPAK) ka dërguar për gjykim në Gjykatën e Posaçme çështjen penale nr. 161/2023, që lidhet me dyshimet për korrupsion zgjedhor gjatë zgjedhjeve vendore në Bashkinë Rrogozhinë.

Të pandehur në këtë çështje janë pesë shtetas: Limon Shala, Fatmir Thaçi, Florant Saraçi, Engjell Cara dhe Shkëlqim Hoxha – ky i fundit ish-kandidat për kryetar bashkie nga radhët e Partisë Demokratike.

Sipas hetimeve të SPAK, shtetasit Cara, Shala, Thaçi dhe Saraçi akuzohen për “korrupsion aktiv në zgjedhje”, kryer në bashkëpunim dhe në më shumë se një rast. Ndërkohë, Shkëlqim Hoxha akuzohet për “moskallëzim krimi”, pasi ka qenë në dijeni të veprimtarisë, por nuk ka lajmëruar autoritetet.

Skema e korrupsionit sipas SPAK
Hetimet kanë zbuluar se në të paktën 64 raste janë ofruar bileta udhëtimi të parapaguara për persona të ndryshëm, me qëllimin e vetëm që ata të udhëtonin për të marrë pjesë në votime dhe të votonin në favor të kandidatit Hoxha.

SPAK thotë se Shkëlqim Hoxha ishte i informuar për skemën dhe rolin e bashkëpunëtorëve të tij, por zgjodhi të heshtte, duke u bërë subjekt i ndjekjes penale.

Bashkimi i dosjeve dhe nisja e hetimit
Çështja 161/2023 është bashkuar me një tjetër procedim penal (162/2023), pasi faktet dhe personat e përfshirë janë të lidhur me njëri-tjetrin. Hetimi nisi pas referimeve nga Drejtoria Vendore e Policisë Durrës, e cila sinjalizoi shkelje të mundshme gjatë zgjedhjeve vendore të vitit 2023 në Rrogozhinë.

SPAK nënvizon se hetimet janë mbyllur dhe pritet që tashmë gjykata të shqyrtojë çështjen, duke vendosur për përgjegjësinë penale të të pandehurve.