Polici i Drejtorisë së Përgjithshme të Burgjeve, Fatjon Baci, ka dhënë dëshminë e tij duke u shprehur se kryebashkiaku i Tiranës, Erion Veliaj, ka përdorur aparatin e tij celular për të realizuar dy telefonata private, përpara dhe pas paraqitjes në ambientet e SPAK-ut.

Gazetarja Klodiana Lala raporton se sipas deklaratës së dhënë nga Baci, telefonatat janë bërë në një moment kur Veliaj ndodhej në shoqërimin e policisë, pas vendimit të njohjes me akuzat ndaj tij. Baci tregon se ngjarja ndodhi në një zonë pranë sheshit ku dikur zhvillohej një treg i sendeve të përdorura.

“Sa kemi kaluar shinat, në vendin ku ka qenë një pazar që shiteshin gjëra të vjetra, Erioni më kërkoi telefonin që të bënte një telefonatë. Ia dhashë, dhe foli me vëllain e tij. Këtë e verifikova më vonë,” – tha Baci.

Por sipas tij, më emocionale ishte telefonata e dytë, që Veliaj e bëri me bashkëshorten e tij. “Nuk i mbaj mend detajet e tjera, por di që ka bërë dhe një telefonatë tjetër me bashkëshorten e tij, ku i tha që të kujdesej për djalin dhe unë dëgjova Erionin që po qante. I thoshte që nuk është e drejtë që djali të rritet vetëm, nuk i kam bërë keq njeriu, nuk ka të mirë për të mirin”, mësohet të jetë shprehur ai.