Një ngjarje me fat në Shëngjin ku një vajzë 9-vjeçare, e cila ishte larguar nga prindërit gjatë pushimeve në plazh, u gjet dhe u kthye në familjen e saj nga policia lokale.
Familja nga Kosova kishte njoftuar menjëherë Policinë e Lezhës pasi vajza e mitur nuk ishte gjendur dhe kishte shqetësuar shumë prindërit. Pas marrjes së alarmit, patrullat e policisë që ishin në terren me biçikleta në zonën e plazhit nisën kërkimet intensive për gjetjen e vogëlushes.
Falë angazhimit të shpejtë dhe profesional të punonjësve të Policisë së Shëngjinit, vajza u gjet në gjendje të mirë shëndetësore dhe u dorëzua menjëherë tek prindërit e saj, që ndodheshin në pushime në zonë.
