Në një intervistë për emisionin “Inside Albania” në Euronews Albania, Linda Rama, bashkëshortja e kryeministrit Edi Rama, foli për ndikimin që ka teknologjia tek fëmijët dhe shoqëria në tërësi. Ajo ndau përvojën personale si nënë, dhe tregoi se përdorimi i teknologjisë nga fëmijët duhet të kontrollohet dhe të jetë pjesë e një edukimi të vazhdueshëm.

Linda Rama tha se me djalin e saj 11-vjeçar, Zahon, mundon të vendosë kufij të qartë për përdorimin e teknologjisë. “Qasja ime është që teknologjia të përdoret për mësim, jo për argëtim,” tha ajo.

Ajo theksoi se sfidat me teknologjinë, rrjetet sociale dhe inteligjencën artificiale nuk janë vetëm të Shqipërisë, por edhe të vendeve më të zhvilluara në Europë. Si shembull solli Suedinë, e cila dikur ishte ndër të parat që përdori pajisjet digjitale në shkolla, por tashmë ka nisur të tërhiqet, pasi studimet kanë treguar efekte negative te fëmijët.

“Edhe vendet nordike po përballen me këto sfida. Nuk kemi ende një formulë të saktë si ta menaxhojmë teknologjinë te fëmijët,” tha Linda Rama.
Në bisedë me gazetaren Alice Taylor, u prek edhe çështja e klimës dhe e pasigurive që lidhen me të ardhmen e fëmijëve. Linda Rama shtoi se bota sot po përballet me më shumë pasiguri se kurrë, dhe se më parë ishim më optimistë për të ardhmen që do t’u linim brezave të rinj.

“Sot jemi më të pasigurt për të ardhmen e fëmijëve tanë. Teknologjia dhe ndryshimet klimatike janë sfida që po na prekin të gjithëve,” përfundoi Linda Rama.