Kreu i Komisionit Qendror të Zgjedhjeve, Ilirjan Celibashi, bëri me dije sot se mandati i koalicionit “Nisma Shqipëria Bëhet”, nga zgjedhjet e 11 majit, i kalon kandidates Kleana Xhuveli.

Kjo e fundit ka marrë zyrtarisht mandatin e koalicionit “Nisma Shqipëria Bëhet” dhe në shtator do ta shohim në Kuvendin e Shqipërisë. 

“Kandidatët e listës së mbyllur që dorëzuan dorëheqje më 11 maj konsiderohen jo më kandidatë, dhe këto dorëheqje nuk mund të rikonsiderohen pasi listat janë miratuar dhe procesi është i mbyllur juridikisht,” tha Celibashi.

Ndërkaq në një deklaratë të shkurtër per mediet Xhuveli bëri të ditur se është kushërira e Lapajt dhe se do të mbajë mandatin e saj deri në momentin që ai t’i rikthehet të zotit, pra Lapajt.

“Deri në ditët qe beteja ligjore do ta kthejë te i Zoti, te njeriu më i besuar i tij Adriatik  Lapaj. Unë jam 27 vjeçe dhe jam kushërira e Adriatik Lapajt”, mësohet të jetë shprehur ajo. 

Kleana Xhuveli është një juriste e re, e angazhuar në zgjedhjet e 11 majit 2025, me koalicionin “Nisma Shqipëria Bëhet”, në bashkëpunim me Adriatik Lapajn.

Dhe pas kandidimit, siç edhe dy ish-aleatët kishin rënë dakord, ajo dha dorëheqjen, mirëpo e revokoi më pas duke kërkuar zyrtarisht ta merrte mandatin e deputetes, me qëllim që të linte jashtë dajën e Endri Shabanit, Zeqir Kordhonin, i cili mesa duket ishte dhe shkaku i këtij sherri, Lapaj-Shabani.