Kreu i SPAK, Altin Dumani, ka bërë me dije se janë regjistruar 56 kallëzime nga partitë politike për krime të pretenduara zgjedhore, por sipas tij, asnjëra nuk është mbështetur me prova konkrete.
"Shumica e kallëzimeve lidhen me raste si ‘asfalt elektoral’, punësime të paligjshme apo përdorim i administratës në fushatë", tha Dumani. Megjithatë, nga verifikimet në terren, hetuesit nuk kanë gjetur prova që të mbështesin këto pretendime.
Nga 193 materiale që janë shqyrtuar në total – përfshirë kallëzime nga qytetarë, policia, prokuroritë dhe iniciativa të vetë SPAK – janë hapur 39 procedime penale, ndërsa për 43 kallëzime është vendosur mosfillimi i çështjes për mungesë të elementëve të veprës penale.
Nga të gjitha rastet që janë aktualisht në hetim, vetëm 4 kanë ardhur si kallëzime nga subjektet politike. SPAK vijon punën për verifikimin e të gjitha rasteve, ndërkohë që thekson rëndësinë e kallëzimeve të mbështetura me prova dhe fakte konkrete.
