Specialistët për Hetimin e Krimeve në Komisariatin e Policisë Cërrik kanë arrestuar në flagrancë një 60-vjeçar, me inicialet D. K., pasi ka thyer masën e sigurisë "arrest në shtëpi", të vendosur nga Gjykata e Elbasanit për veprën penale “Dhuna në familje”.
Burime zyrtare bëjnë me dije se D. K. ka shkuar në banesën e motrës së tij, e cila është e pajisur me urdhër mbrojtjeje ndaj tij. Ky veprim përbën shkelje të hapur të vendimit të gjykatës.
Po ashtu, nga Policia e Cërrikut është ndaluar shtetasi A. M., 34 vjeç, i cili ishte shpallur në kërkim. Ai është dënuar nga Gjykata e Elbasanit me 1 vit e 6 muaj burg për veprën penale “Plagosja e lehtë me dashje”, kryer në bashkëpunim.
Policia bën me dije se të dy rastet janë referuar për veprime të mëtejshme në Prokurorinë pranë Gjykatës së Shkallës së Parë Elbasan.
